Ադրբեջանի արտգործնախարար Էլմար Մամեդյարովը հայտարարել է, որ հայկական ազգանուն ունեցող ՌԴ քաղաքացիները կարող են Բաքու այցելել, բայց պետք է այդ մասին նախապես տեղեկացնեն Մոսկվայում Ադրբեջանի դեսպանությանը: Այս մասին նախարարն ասել է «Իզվեստիա»-ի հետ զրույցում:
Լրագրողը Մամեդյարովին հիշեցրել է 2018թ. ամռանը տեղի ունեցած միջադեպը, երբ 81-ամյա Օլգա Բարսեղյանը, որն անցել էր Լենինգրադի շրջափակմամբ, ժամանել է Բաքու, բայց տարեց կնոջն օդանավակայանից դուրս չեն թողել և արտաքսել են, ինչն առաջացրել էր ՌԴ ԱԳՆ-ի զայրույթը: «Մեկուկես տարի անց հաջողվե՞լ է հարթել այս խնդիրը, թե՞ կարելի է ասել, որ հայկական ազգանուն ունեցող ՌԴ քաղաքացիների մուտքի արգելքն Ադրբեջան նորմ է դարձել»,-հարցրել է լրագրողը:
Ի պատասխան Մամեդյարովն ասել է, որ չի մտաբերում՝ ինչ դեպքի մասին է խոսքը:
«Մենք ասում ենք, եթե կան հայկական ազգանուններով Ռուսաստանի քաղաքացիներ, որոնք ցանկանում են այցելել Ադրբեջան, ի սեր Աստծո, թող այցելեն: Բայց գոնե այդ մասին նախապես տեղյակ պահեն մեր դեսպանությանը, քանի որ Ռուսաստանի հետ ունենք առանց այցագրի ռեժիմ, բայց նախապես ստացվող տեղեկությունը մեզ թույլ կտա խուսափել ինչ-ինչ էքսցեսներից ՝ հաշվի առնելով Ադրբեջանում առկա զգայական ֆոնը գոյություն ունեցող հակամարտության նկատմամբ: Մենք այս թեմայով միշտ բավական անկեղծ ենք խոսում մեր ռուս գործընկերների հետ»,-հավելել է նա:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
