«Վթարը թաքցնելու փորձ չի արվել, մենք ունենք որոշակի շղթա, որով ինֆորմացիան գնում է: Եվ քանի որ դա եղել է առավոտյան ժամը 5-ին, ամեն մեկն իր ղեկավարին տեղեկացնելով, մինչեւ ինֆորմացիան հասել է այն օղակին, որը որ պետք է տեղեկացներ տեսչական մարմնին եւ ԱԻՆ-ին, ես ինքս, 7 անց 55 ստացել եմ ահազանգ տեսչական մարմնի մարզային գրասենյակից եւ ինձ հարց են տվել, թե գետն աղտոտված է»,-այսպես ներկայացրեց կատարվածը «Զանգեզուրի պղնձամոլիբդենային կոմբինատի» կայուն զարգացման գծով տնօրեն Սամվել Ալեքսանյանը՝ պատասխանելով Aravot.am-ի հարցին, թե ինչո՞ւ էր կոմբինատի պոչամբարի պոչատարի վրա տեղի ունեցած վթարը թաքցվել՝ ինչպես որ ներկայացվեց կառավարության նիստում:
Հիշեցնենք, որ հոկտեմբերի 17-ին կոմբինատի պոչատարի վթարման հետեւանքով արտահոսք էր եղել, եւ հոսքաջրերը լցվել են Ողջի գետը՝ փոխելով գետի ջրերի գույնը: Պարոն Ալեքսանյանն ասաց, որ իրենք ամենայն պատասխանատվությամբ են վերաբերվում կատարվածին եւ չեն փորձում արդարանալ. «Արտահոսքը մեր գործունեության պատճառով է եղել եւ մենք պատրաստ ենք կրել այդ պատասխանատվությունը»:
Ըստ նրա, ընդհանուր առմամբ վթարը տեւել է մեկուկես ժամ:
Կարդացեք նաև
Մանրամասները՝ տեսանյութում
Սամվել Ալեքսանյանը մանրամասն ներկայացրեց՝ ինչպես են պոչանքները կոմբինատից խողովակաշարով տեղափոխվում դեպի պոչամբար՝ անցնելով 32 կիլոմետր:
Մանրամասները՝ տեսանյութում
Ինչ վերաբերում է, վթարի հետեւանքով շրջակա միջավայրին հասցված վնասին, ապա, Սամվել Ալեքսանյանն ասաց, աղտոտման ծավալների մասին չեն կարող որեւէ տեղեկատվություն հրապարակել, քանի որ Ընդերքի եւ բնապահպանության տեսչական մարմինը հաշվարկ է կատարում. «Մենք անցել ենք ստուգում անցյալ շաբաթ, տաս օրվա ընթացքում ստանալու են նախնական եզրակացությունը»:
Մանրամասները՝ տեսանյութում
Վթարի իրական լինելը կոմբինատի տնօրինության մոտ որոշ կասկածներ է հարուցել, քանի որ, ըստ Սամվել Ալեքսանյանի, վթարի վայրում, հայտնաբերվել են ավազով լի պարկեր, բետոնե բեկոր եւ տախտակներ: Ընդ որում, վթարը վերացնելուց հինգ օր հետո նույն տեղում ավազով լի պարկեր են հայտնաբերվել:
Լուսինե ԲՈՒԴԱՂՅԱՆ