ՀՀ ՊԵԿ նախկին նախագահ Գագիկ Խաչատրյանի եղբորորդու՝ ՊԵԿ ներքին անվտանգության վարչության նախկին պետ Կարեն Խաչատրյանի կալանքի ժամկետը երկարաձգվել է երկու ամսով՝ Երեւանի ընդհանուր իրավասության դատարանի քիչ առաջ հրապարակված որոշմամբ: «Միաժամանակ, դատարանն այս անգամ իր բարձրության վրա գտնվեց: Մեր միջնորդությունը բավարարվեց՝ Կարեն Խաչատրյանին գրավով ազատ արձակելու վերաբերյալ: Կարեն Խաչատրյանը գրավի գումարը վճարվելուց հետո կարող է ազատ արձակվել:
Սա ուշացած, բայց արդարության առումով ճիշտ որոշում էր: Գրավի չափը սահմանվել է 20 միլիոն դրամ: Կարեն Խաչատրյանն ազատ կարձակվի այն ժամանակ, երբ ֆիզիկապես հնարավոր կլինի այն վճարել: Պետք է հիմա խոսեմ նրա ընկերների հետ, նրանք այստեղ են»,-լրագրողների հետ ճեպազրույցում հայտարարեց Կարեն Խաչատրյանի պաշտպան, փաստաբան Ամրամ Մակինյանը: Նրա խոսքով՝ Խաչատրյանին կալանքի տակ պահելու հիմքեր չկային, նա հինգ ամիս է, ինչ կալանավորված էր:
Հիշեցնենք, որ 2019թ.-ին ԱԱԾ-ի խուզարկությունների ավարտից հետո ՊԵԿ նախկին նախագահ Գագիկ Խաչատրյանը և նրա եղբորորդին՝ ՊԵԿ նախկին պաշտոնյա Կարեն Խաչատրյանը բերման էին ենթարկվել: Նրանք մեղադրվում են ծանր հետևանքների առաջացմամբ զուգորդված պաշտոնեական դիրքի չարաշահում և առանձնապես խոշոր չափերով գույքի վատնում կատարելու համար:
Լուիզա ՍՈՒՔԻԱՍՅԱՆ
