Կորոնավիրուսը Հայաստան եկավ Իրանից, եւ երկրորդ հարցը, որը խուճապային տրամադրություն է առաջացնում, Իրանից բեռնատար մեքենաների անխոչընդոտ մուտքն է։ Հասկանալի է, որ Իրանից եկող բեռնատարների մուտքն արգելելը վնասակար է տնտեսության համար, սակայն ախտահանո՞ւմ են արդյոք այս երկրից մուտք գործող բեռնատարները։ Սահմանային հսկողությամբ զբաղվում է առողջապահական տեսչական մարմինը։ Այս մարմնի մամուլի պատասխանատու Լիլիթ Եղիազարյանին հարցրինք, թե արդյոք ախտահանվո՞ւմ են Իրանից եկող բեռնատարները։ «Մենք որեւէ նման գործառույթ չունենք,- ասաց նա,- եթե ախտահանում ասելով նկատի ունեք կորոնավիրուսից մաքրումը, ապա նման ընթացակարգ նախատեսված չէ, որովհետեւ, ըստ համաճարակաբանների, այդ վիրուսը չոր մակերեւույթով չի տարածվում։ Միջազգային առողջապահական վերջին կանոններով, բեռների ախտահանման ընթացակարգ չի նախատեսվում, որովհետեւ դրանցով կորոնավիրուսի տարածման ռիսկը մոտ է զրոյի»։
Այնուամենայնիվ, կորոնավիրուսի հայրենիքից՝ Չինաստանի Ուհան քաղաքից, բեռնափոխադրումներն արգելափակված են մինչեւ մարտի 10-ը, իսկ դեպի Ուհան ուղեւորվում են միայն առաջին անհրաժեշտության սնունդ եւ պարագաներ։ Սա նշանակում է, որ բեռնափոխադրումները, այնուամենայնիվ, կարող են վտանգավոր լինել։
Սյուզան ՍԻՄՈՆՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
