Հարությունյան-Գրիգորյան ընտանիքների բարեգործական նախաձեռնությունը համաքաղաքացիներին
Հայաստանում շարունակվում են նոր տեսակի կորոնավիրուսով պայմանավորված արտակարգ դրության պայմաններում իրականացվող միջոցառումներն ու բարեգործական ակցիաները:
Այս անգամ բարեգործության հետքերով հասանք Լոռու մարզի քաղաք Վանաձոր: Հարությունյանների եւ Գրիգորյանների ընտանեկան նախաձեռնությամբ ավելի քան 60 ընտանիք ստացավ սնունդով լի փաթեթներ:
Բելգիայում բնակվող Հարություն Հարությունյանը երջանկահիշատակ մոր՝ Ֆլորա Հարությունյանի անունից ցանկություն է հայտնել օգնել սոցիալապես անապահով համաքաղաքացիներին: Վերջինիս աջակցությամբ՝ Վանաձորում բնակվող քրոջ՝ Գրիգորյանների ընտանիքը իրականացրեց այս նախաձեռնությունը:
Կարդացեք նաև
Նախաձեռնությունն իրականացնող Հովհաննես Գրիգորյանի խոսքերով՝ պետք է յուրաքանչյուրը գիտակցի իրավիճակի լրջությունն ու հնարավորության սահմաններում օգնի կարիքավորներին. «Այս դժվար պայմաններում մեր ընտանիքը ցանկացավ օգնել մեր համաքաղաքացիներին, ինչը կենդանության օրոք մեր տատիկն էր միշտ անում: Այս քայլով մենք ցանկացանք շարունակել նրա բարի գործն ու կորոնավիրուսի հետեւանքով սոցիալական խնդիրների առաջ կանգնած մարդկանց համար պատրաստեցինք սնունդով լի տոպրակներ, եւ անմիջապես Ֆլորա տատիկիս անունը կրող հաստատությունից փոխանցեցինք նրանց»:
Հովհաննեսի կնոջ՝ Հայկուշ Մեմբրեյանի հաղորդմամբ՝ իրենք նախապես ցուցակագրել էին շահառուներին՝ ընդգրկելով անապահով եւ թոշակառու քաղաքացիների: Վերջիններս, անձնագրով ներկայանալով, ստանում էին օգնության փաթեթները:
Նշենք, որ մոտ 20 կգ կշռող փաթեթների մեջ ներառված էին ալյուր, ձեթ, մակարոնեղեն, հատիկեղեն, քաղցրավենիք, շաքարավազ եւ սուրճ:
Շահառուներից Մարիետա Ղազախեցյանն իր խորին շնորհակալությունն է հայտնում Հարությունյան եւ Գրիգորյան ընտանիքներին. «Այս ֆորսմաժորային իրավիճակում, որում բոլորս ենք գտնվում, նմանատիպ բարեգործություններն անգնահատելի են: Թող այս ընտանիքների քայլը օրինակելի լինի այն մարդկանց համար, ովքեր իրենց ստվերում են պահում այս օրհասական պահերին»:
Անուշիկ ՅՈԼՉԻՆՅԱՆ
«Առավոտ» օրաթերթ
30.04.2020
