ԱԺ-ն այսօր քննարկում է «Շաքարախտով հիվանդացության աճի դեմ պայքարում ԱՊՀ մասնակից պետությունների գործակցության մասին» համաձայնագիրը վավերացնելու հարցը: Համաձայնագիրը ստորագրվել է 2008թ.-ին, Հայաստանը միացել է դրան: Ինչպես նշեց ՀՀ առողջապահության փոխնախարար Անահիտ Ավանեսյանը, ԱՊՀ երկրներում իրականացվում են մի շարք գործառույթներ, որոնք մեր երկրում եւս կնպաստեն հիվանդացության մակարդակի նվազեցմանը, տեղեկատվական, գիտամեթոդական հարցերի քննարկմանը. «Կարեւոր է հիվանդների կյանքի որակի պահպանմանն ուղղված գիտելիքների ձեռքբերումը, որի ուղղությամբ փորձում ենք գործակցել մյուս երկրների հետ»:
Թե ինչու է համաձայնագրի վավերացումն այսքան երկար տեւել, Անահիտ Ավանեսյանը պարզաբանեց. «Կարծում եմ՝ բյուրոկրատական հարցեր են եղել, բայց վերջին տարում ակտիվացրել ենք ԱՊՀ շրջանակում նման քննարկումները»:
Փոխնախարարը, թեեւ այս պահին վիճակագրության չի տիրապետում, բայց տեղեկացրեց, որ բոլոր երկրներում, այդ թվում՝ ՀՀ-ում, շաքարախտով հիվանդացության աճի միտում է նկատվում. «Ֆիզիկական պասիվությունը եւ ոչ ճիշտ սննդակարգը նպաստում են հիվանդացության աճին: ՀՀ-ն միջին ցուցանիշներ ունի այս առումով, բայց արտառոց կամ տարբերվող ցուցանիշներ չկան: Այս հիվանդացությունը մահացության առումով ՀՀ-ում 4-րդ տեղում է»:
Կարդացեք նաև
Լուիզա ՍՈՒՔԻԱՍՅԱՆ
