Մարդու իրավունքների եվրոպական դատարանը (ՄԻԵԴ) հրապարակել է ադրբեջանցի հետաքննող լրագրող Խադիջա Իսմայիլովայի՝ ընդդեմ Ադրբեջանի գործով (35283/14) որոշումը: Սա արդեն եվրոպական դատարանի երրորդ վճիռն է Իսմայիլովայի գործով:
ՄԻԵԴ-ը վճռել է, որ խախտվել է Մարդու իրավունքների եվրոպական կոնվենցիայի 8-րդ հոդվածը (հարգանք անձնական կյանքի նկատմամբ): Այսպիսով, դատարանը պարտավորեցրել է Ադրբեջանի իշխանություններին Իսմայիլովային վճարել 4500 եվրոյի փոխհատուցում, ինչպես նաև 1500 եվրո՝ դատական ծախսերի համար:
ՄԻԵԴ հաղորդագրության համաձայն՝ Խադիջա Իսմայիլովան, որը ծնվել է 1976թ. և ապրում է Բաքվում, հանրահայտ հետաքննական լրագրող է, որը աշխատել է նաև Ազատություն ռադիոկայանի ադրբեջանական ծառայությունում: Նա հայտնի է Ադրբեջանի իշխանությունների հանդեպ կոշտ քննադատությամբ և հետաքննություններ է անցկացնում երկրում կոռուպցիոն գործընթացների վերաբերյալ, որոնք հովանավորվում են ամենաբարձր մակարդակով:
Հիշեցնենք, որ ավելի վաղ ՄԻԵԴ-ը վճռել էր, որ խախտվել են Իսմայլիովայի ազատության, անձնական անձեռնմխելիության, արդար դատական քննության, ազատ արտահայտվելու իրավունքները, և Ադրբեջանի իշխանություններին պարտավորցրել էր լրագրողին որպես փոխհատուցում պետք է վճարել 25 հազար եվրո:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
