«Դուք ասում եք՝ վիրակապով նստած է եղել. դուք պատկերացնո՞ւմ եք, որ հրազենի վնասվածքից մարդու մայկան արյունոտված չլինի: Դուք Գագիկին որ տեսաք վիրավոր՝ ասացի՞ք մայկան բարձրացրու տեսնեմ՝ ուրիշ վիրավորում կա՞, թե՞ չէ»,- այս հարցերն այսօր «Սասնա ծռեր» խմբավորման կողմից ՊՊԾ գնդի գրավման գործով դատական նիստի ժամանակ վկա Տիգրան Մանուկյանին ուղղեց զոհված ոստիկան Գագիկ Մկրտչյանի կինը:
Հիշեցնենք՝ դատարանում շարունակվում է վկաների հարցաքննությունը: Այսօր դատարանը լսեց «Սասնա ծռերի» մայր գործից անջատված մասով ամբաստանյալ Տիգրան Մանուկյանին:
«Ոչ»,- եղավ վկայի պատասխանը: Զոհված ոստիկանի կինը շարունակեց. «Բա ինչպե՞ս եք հարյուր տոկոս պնդում, որ ինքը լավ է եղել, ոչ մի ուրիշ վիրավորում չի ստացել, փորի վնասվածքն էլ ձեզ համար հայտնի չէր»:
«Որովհետեւ, այդ վայրկյանների ընթացքում, որ ես իրեն տեսել եմ՝ քայլեց, գնաց ու նստեց թաղտին՝ շատ նորմալ, առողջ վիճակում էր, կարելի ա ասել»,- պատասխանեց վկան:
Կարդացեք նաև
«Ինքը ֆիզիկապես շատ պատրաստված տղամարդ էր, հնարավոր ա, բայց, որ դուք շեշտում եք եւ հայտարարություն եք անում, որ փորի վնասվածքը անհնար էր… ես չգիտեմ՝ որտեղի՞ց եւ ինչի՞ց եք պնդում»,- հակադարձեց Գագիկ Մկրտչյանի կինը՝ պնդելով, որ ամուսինն իրեն ասել էր, որ վնասվածքն ավելի վաղ էր ստացել եւ իրեն դրսում են վիրակապել, ու ինքն ամուսնուն է հավատում:
Վկան պնդեց՝ եթե Գագիկ Մկրտչյանը որովայնից վնասված լիներ, ինքը անպայման տեսած կլիներ, եւ որովայնից վիրավոր մարդը երբեք չի կարող իր ոտքով գնալ ու նստել թաղտին:
Գագիկ Մկրտչյանի կինը վրդովվեց. ասաց՝ շատ է ափսոսում այն խաչը, որը վկան իր վզին գցել ու նստել է, քանի որ ուղղորդված է հարցերին պատասխանում, պետության վրա են հարձակվել, մարդկանց վրա են հարձակվել, սպանություններ են եղել եւ սուտ ցուցմունք է տալիս:
Այդ ընթացքում ամբաստանյալ Արեգ Կյուրեղյանը ինչ-որ հայտարարություն արեց տեղից: Դա բարկացրեց զոհված ոստիկանի կնոջը. նա բարկացած բղավելով սկսեց նախատել ամբաստանյալին: Դատարանը երկուսի նկատմամբ էլ սանկցիա կիրառեց. Կյուրեղյանին տասը, իսկ զոհված ոստիկանի կնոջը մեկ ժամով հեռացրեց նիստերի դահլիճից:
Իսկ դատավորի հարցին ի պատասխան՝ վկա Տիգրան Մանուկյանն ասաց, որ Արմեն Լամբարյանին չի տեսել գնդի զինանոցի շինությունում: Նկատենք, որ այս մասով, գործի նյութերում հակասական տեղեկություններ են առկա:
Նելլի ԳՐԻԳՈՐՅԱՆ
