Մարդու իրավունքների պաշտպանի (ՄԻՊ) աշխատակազմի քրեական արդարադատության ոլորտում իրավունքների պաշտպանության վարչության պետ Արամ Մինասյանը, «Մեդիա կենտրոնում» հրավիրված քննարկմանն անդրադառնալով «Նուբարաշեն» ՔԿՀ-ի չորրորդ պատժախցում օգոստոսի 23-ի առավոտյան քրեակատարողական ծառայողների կողմից դատապարտյալների նկատմամբ բռնություն կիրառելու դեպքին, ասաց՝ ՄԻՊ արագ արձագանքման խմբի այցի արդյունքները բավարար հիմք էին տալիս իրենց անմիջապես քրեական վարույթ հարուցելու գրություն ուղարկել ՀՀ գլխավոր դատախազություն:
Նա մանրամասնեց. «Օգոստոսի 24-ին՝ մինչ լրատվական միջոցներով տեղեկատվության տարածումը, «Նուբարաշեն» ՔԿՀ-ում տեղի ունեցածի վերաբերյալ մենք ունեցել ենք ահազանգ: Արագ արձագանքման խումբը մեկնել է քրեակատարողական հիմնարկ, ընթացքում մեկ ահազանգ էլ ենք ստացել այն մասին, որ քրեակատարողական հիմնարկում իրականացվող խուզարկության ընթացքում անձանց նկատմամբ գործադրվել է ոչ համաչափ ուժ, առանձնազրույց ենք ունեցել այդ օրը պատժախցում գտնված երեք անձանց հետ: Նույնիսկ մեր այցի ընթացքում նշված ազատազրկված անձանցից մեկը նաև գրավոր դիմում-բողոք է հասցեագրել ՄԻՊ-ին»:
Արամ Մինասյանի փոխանցմամբ՝ տեղեկություն ունեն, որ գլխավոր դատախազության կողմից նշված դեպքի հետ կապված թե′ իրենց գրությունը, թե′ ազատազրկված անձի կողմից երկու հաղորդումները հանցագործության մասին ուղարկվել են ՀՔԾ: Ներկայումս դեռ քրեական գործ հարուցված չէ, բայց այդ ուղղությամբ նյութեր են նախապատրաստվում: Նա նաև հայտնեց. «Նշանակված են նաև դատաբժշկական փորձաքննություններ նշված անձանց մարմնական վնասվածքների աստիճանի, վնասվածքների պատճառման մեխանիզմները պարզելու նպատակով»:
Արամ Մինասյանը նաև նշեց՝ բացի քրեական վարույթ նախաձեռնելու պահանջ ներկայացնելուց՝ գրություն են հասցեագրել արդարադատության նախարարություն, որում հարցադրումներ են ներկայացվել քրեական ենթամշակույթի դեմ պայքարում իրականացվող գործողությունների հիմքերի պատճառների և ուժի գործադրման համաչափ կիրառելիության կապակցությամբ, սակայն դեռ պատասխան չունեն:
Կարդացեք նաև
Նա նաև հայտնեց, որ «Նուբարաշեն» ՔԿՀ-ի միջադեպին հաջորդող օրը ահազանգ են ստացել «Արթիկ» քրեակատարողական հիմնարկից ոչ համաչափ ուժի կիրառման վերաբերյալ: Կրկին մեկնել է արագ արձագանքման խումբ: Արամ Մինասյանը տեղեկացրեց, որ դեռ չի ցանկանում երկու ՔԿՀ-ներում կատարվածին գնահատական տալ, քանի որ այդ հարցերը պետք է քննարկվեն, և դրանց վերաբերյալ գնահատականներ պիտի տան քրեական վարույթ իրականացնող մարմինները:
Խոսելով քրեական ենթամշակույթի դեմ պայքարի մասին՝ Արամ Մինասյանն ասաց. «Միայն օրենքում փոփոխություն կատարելը բավարար չէ, որպեսզի քրեական ենթամշակույթի դեմ պայքարը լինի արդյունավետ: Դեռ 2018-ին ՄԻՊ կողմից հրապարակվել է հայեցակարգ քրեակատարողական հիմնարկներում քրեական ենթամշակույթի դեմ պայքարի վերաբերյալ: Դրա համար համալիր մոտեցումներ են պետք՝ սոցիալական երաշխիքներ, վարձատրություն, հաստիքների ավելացում՝ բարձր պրոֆեսիոնալիզմով քրեակատարողական ծառայողների ներգրավմամբ»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
