Aravot.am-ը Ֆինանսների նախկին նախարար, տնտեսագետ Վարդան Արամյանին հարց է ուղղել՝ ի՞նչ է պետք անի ՀՀ կառավարությունն այսօր կամ ապագայում, որպեսզի Հայաստանի ռազմական ներուժը մեծացնի, տնտեսական ի՞նչ հենարանի վրա պետք է հենվել, որպեսզի կարողանանք պաշտպանական ծախսերն ավելացնել, զենք գնել:
Ի պատասխան Վարդան Արամյանն ասաց. «Նորություն ասած չեմ լինի, եթե նշեմ՝ Հայաստանի ռազմական պոտենցիալը մեծացնելու երկու ուղի կա. առաջին՝ սեփական ռազմական արտադրությունը վերազինենք եւ զարգացնենք, երկրորդ՝ արտաքին աշխարհից նորագույն տեխնոլոգիաներով հագեցած զենքեր գնենք: Չխորանամ նշված երկու ուղղությունների կյանքի կոչելու դետալների մեջ այս պահին, որովհետեւ երկար քննարկման հարցեր են, բայց մի բան ակնհայտ է, որ երկու դեպքում էլ պահանջվելու են ֆինանսներ: Իսկ վերջինս պետության ձեռքում հայտնվելու է տնտեսությունից հարկերի տեսքով: Հետեւապես ամենաբարդ խնդրին կա պարզ լուծում. օգնել գործարարներին, որպեսզի ե՛ւ այսպիսի իրավիճակներում, ե՛ւ ապագայում իրենք էլ «օգնեն» կառավարությանը եւ մեզ բոլորիս՝ ֆինանսներ գեներացնելով եւ հարկեր վճարելով:
Իսկ տնտեսվարողներին օգնել կառավարության տեսանկյունից, նշանակում է՝
ա. ապահովել տնտեսվարողների համար կայուն մակրոտնտեսական միջավայր,
Կարդացեք նաև
բ. լինել կանխատեսելի իր որոշումներով եւ գործողություններով,
գ. ունենալ հեռանկարային տնտեսական ծրագրեր՝ ընկալելի տնտեսվարողների համար, որպեսզի վերջիններս դրանց հենքի վրա պլանավորեն իրենց ապագա անելիքները:
Այս պահին թերեւս (ա) կետում նշվածը հաջողվում է իրականացնել ՀՀ ԿԲ եւ ՀՀ ֆինանսների նախարարության համատեղ ջանքերով, (գ) կետի նշվածում կառավարությունը կաղում է, բայց դա երկար քննարկման հարց է, իսկ բ. կետում նշվածն այսօր էլ որպես էական խնդիր առկա է, եւ օր առաջ կառավարությունը պետք է՝
1. հրաժարվի ամեն պատեհ եւ անպատեհ առիթներով քր. գործեր հարուցելուց՝ հատկապես տնտեսական թեմաներով, եւ տնտեսվարողների նկատմամբ ցուցադրական ներխուժումներ իրականացնելուց: Դա տնտեսվարողների մոտ ստեղծում է վախ, անհստակություն ապագայի նկատմամբ եւ սկեպտիցիզմ։
2. Հրաժարվի տնտեսվարողների հուզող հարցերը, նամակները կամ բարձրացրած հարցերը անպատասխան թողնելուց կամ իրենց վերաբերող որոշումներն անընդհատ ձգձգելուց (թերեւս Լիդիանն ակնառու օրինակ է եւ դաս մյուս տնտեսվարողների համար): Տնտեսվարողի համար խիստ կարեւոր է հստակությունը եւ կառավարության կողմից արագ եւ արդյունավետ որոշումների կայացումը»:
Լուսինե ԲՈՒԴԱՂՅԱՆ
