ԲՀԿ պատգամավոր Նաիրա Զոհրաբյանն այսօր ասել էր, որ անգամ այն մարդիկ, որոնք հավատացել էին Նիկոլ Փաշինյանին ու ընտրել էին նրան վարչապետ, հիմա հասկացել են, որ գործ ունեն «պաթոլոգիկ ստախոսի» հետ: Նա նաեւ հայտարարեց, որ Փաշինյանը ստում է հիմա, ինչպես ստում էր, երբ լրագրող էր, կամ երբ պատգամավոր էր:
Aravot.am-ը Նաիրա Զոհրաբյանին հարցրեց՝ դուք երկար տարիներ աշխատել եք իր հետ, փաստորեն, աշխատել եք «պաթոլոգիկ ստախոսի» մո՞տ՝ նա պատասխանեց. «Փաստորեն, ստացվում է՝ այո, աշխատել եմ ստախոսի մոտ, ինչի համար հայցում եմ բոլորի ներողամտությունը: Ես ինչո՞ւ եմ հիմա այսպես…ամեն ինչ անելու եմ, որ այդ մարդը հեռանա, որովհետեւ ես ունեմ մեղքի իմ բաժինը: Իմանալով, թե ինչպիսի անձնավորություն է գալու իշխանության՝ ես չեմ ասի, թե վախեցա, չէ՛, ես վախեցող տեսակ չեմ, միգուցե ես խնայեցի իմ երեխայի էմոցիաները, որ չբերեն իմ երեխայի մոտ, տան դիմաց եւս դագաղներ դնեն: Բայց հիմնական մոտիվը լռելու եղել է այն, որ ես տեսա, որ ժողովուրդը սատարում է իրեն: Ես մտածեցի՝ այսքան տարիներ մեր երկրում ընտրությունները կեղծվել են, գոնե մեկ անգամ թող լինի այնպես, ինչպես ուզում է ժողովուրդը՝ իմանալով, թե մենք ինչպիսի մարդու ենք հանձնում իշխանություն: Ես իմ մեղքի բաժինն ունեմ այդտեղ ու ես իմ մեղքը պիտի քավեմ՝ անկախ նրանից, թե ինչ կանեն ինձ՝ քրեական գործեր կհարուցեն, իրենց ֆեյք ինդուստրիայով: Արդեն այնքան սրբապիղծ են, որ մտնում են` ընդհուպ Սամվել Մկրտչյանի հիշատակն են պղծում: Ես իմ մեղքը քավելու եմ մինչեւ վերջ, անգամ իմ կյանքի գնով»:
Հռիփսիմե ՋԵԲԵՋՅԱՆ
