«ՀՀ կառավարման համակարգն անգլուխ է: Գլուխը կա, բայց դատարկ է ու օր առաջ այդ գլուխը պետք է թռցվի»,- այսօր Ազատության հրապարակում հանրահավաքի ժամանակ ասաց ՀՅԴ անդամ Գեղամ Մանուկյանը:
Նա տեղեկացրեց, որ այսօր քիչ առաջ հայտարարություն են ընդունել Սյունիքի մարզի մի շարք համայնքների ղեկավարներ ու ավագանու անդամները, որտեղ պահանջում են Նիկոլ Փաշինյանի եւ կառավարության հրաժարականը. «Ստորագրել են այն համայնքների ղեկավարները, որոնք պատերազմի ժամանակ նաեւ եղել են առաջնագծում: Գորիս համայնքի ղեկավար Առուշ Առուշանյան եւ ավագանու անդամներ, Կապան համայնքի ղեկավար Գեւորգ Պարսյան եւ ավագանու անդամներ, Սիսիան համայնքի ղեկավար Արթուր Սարգսյան եւ ավագանի, Քաջարան համայնքի ղեկավար Մանվել Փարամազյան եւ ավագանի, Մեղրի համայնքի ղեկավար Մխիթար Զաքարյան եւ ավագանի, Տեղ համայնքի ղեկավար Ներսես Շադունց եւ ավագանի, Տաթեւ համայնքի ղեկավար Մուրադ Սիմոնյան եւ ավագանի»:
Գեղամ Մանուկյանը դիմեց Սյունիքից ընտրված պատգամավորներին, հատկապես՝ Արմեն Խաչատրյանին. «Ձեզ ամբողջ Սյունիքն է ասում՝ Նիկոլ, հեռացիր»:
Հռիփսիմե ՋԵԲԵՋՅԱՆ
