2016թ.-ին ՀՀ Ոստիկանության ՊՊԾ գունդը գրաված «Սասնա ծռեր» զինված խմբին օժանդակելու եւ Սարի թաղում զանգվածային անկարգություններ կազմակերպելու համար մեղադրվող Անդրիաս Ղուկասյանի գործով նիստերը կվերսկսվեն:
Հիշեցնենք, այս գործով դատավորի պաշտոնավարման ժամկետը լրացավ`գործի քննության վերջնական փուլում: Գործով նոր դատավոր է նշանակվել` Դավիթ Հարությունյանը: Վերջինս Պետական պահպանության ծառայության նախկին պետ գեներալ-լեյտենանտ Հրաչյա Հարությունյանի (Կրակեմ Հրաչ) որդին է, որը պաշտոնավարել է նաև 2016 թվականին` Սարի Թաղի իրադարձությունների ժամանակ։
Անդրիաս Ղուկասյանի գործը կքննվի նորից. այսօր դատարանում նա այդպես պնդեց:
Aravot.am-ի հետ զրույցում Անդրիաս Ղուկասյանը գործի նորից քննության անհրաժեշտությունը բացատրեց այսպես. «Շատ տուժողներ եւ վկաներ սուտ ցուցմունքներ են տվել հարցաքննության ժամանակ: Հիմա, շատ կարեւոր է նորից հարցաքննել այդ մարդկանց. հնարավոր է համադրել ոստիկանների ցուցմունքները եւ տեսագրություններում նկարահանված իրադարձությունները`շատ հեշտ է բացահայտել ցուցմունքների սուտ լինելու հանգամանքը»:
Կարդացեք նաև
Հիշեցնենք, որ ըստ տուժողների, քաղաքացիներն էին Սարի Թաղում, ամսի 29-ի իրադարձությունների ժամանակ, քարերով եւ փայտերով, հարձակվել ոստիկանության ներկայացուցիչների վրա: Ըստ հակառակ կողմի`ոստիկաններն էին հարձակվել քաղաքացիների վրա եւ բռնություններ կիրառել:
«Իրականում, սա էական հանգամանք է եւ կարեւոր է իրականության արձանագրումը`ոչ միայն ինձ համար, այլ հանրության համար, որովհետեւ, ինձ ներկայացված մեղադրանքը`իբր ես Սարի թաղում կազմակերպել եմ զանգվածային անկարգություններ, զրպարտություն է ողջ հանրության նկատմամբ, որովհետեւ, մեր քաղաքացիները Սարի թաղում, 2016 թվականի հուլիսի 25-ին անկարգություններ միանշանակ չեն կատարել: Այդ զրպարտությունը բացահայտելը իմ քաղաքական նպատակներից մեկն է եւ ես, բնականաբար, հետեւողական պահանջում եմ, որ բոլոր ապացույցները նորից հետազոտվեն»,- ասաց Անդրիաս Ղուկասյանը:
Հաջորդ նիստում, հավանաբար, կորոշվի ապացույցների ուսումնասիրության կարգը:
Ինչ վերաբերվում է գործը քննող դատավորին, Անդրիաս Ղուկասյանը մի փոքր տարակուսած է, քանի որ նա պաշտոնաթող նախագահ Սերժ Սարգսյանի ժամանակ պահպանության ծառայության ղեկավարի որդին է. «Դա, իհարկե, վստահություն չի ներշնչում, որ քննությունը լինելու է օբյեկտիվ եւ անաչառ: Սերժ Սարգսյանի համար սկզբունքային է այս գործը եւ ինքը իր բոլոր ռեսուրսները օգտագործել, օգտագործում եւ օգտագործելու է`իմ կատմամբ քրեական հետապնդում իրականացնելու համար: Մոտակա դատական նիստը կբացահայտի այս դատավորի անաչառությունը, քանի որ մտադիր եմ մի շարք միջնորդություններ ներկայացնել, այդ ժամանակ էլ ես կտամ իմ գնահատականը»:
Նելլի ԳՐԻԳՈՐՅԱՆ
