«Հայահավաք» շարժման համակարգող հանձնախմբի անդամ Արշակ Զաքարյանը վստահեցրեց՝ շարժումը շատ ավելի մեծ թափ է հավաքել: Մամուլի ասուլիսի ընթացքում խոսելով իրենց հետագա անելիքների և ծրագրերի մասին՝ նա նշեց՝ աշխարհասփյուռ հայերը պետք է հավաքվեն, և միասին կարողանանք դուրս գալ այս ճգնաժամից:
Արշակ Զաքարյանը զգուշացրեց՝ այսօր վտանգված է մեր գոյությունը: Իրավիճակից դուրս գալու մասին ասաց. «Նախ պետք է կանգնեցնել գահավիժումը: Այսօրվա իշխանությունները մեր երկիրը տանում են կործանման: Երկրի մի ահռելի զանգված կորցրել ենք, չենք մտածում, իհարկե, որ դա կորցրել ենք հավերժ»:
Կարդացեք նաև
«Հայահավաքի» կազմկոմիտեի ներկայացուցիչ Արամ Սարգսյանը շեշտեց՝ այս պահին կարևոր է միավորել հայության հնարավոր ներուժը. դա այսօր ամենամեծ հրամայականն է, քանի որ ներկայիս իշխանություններն իր ձևակերպմամբ՝ մեզ տանում են ոչ թե տաճար, այլ դեպի դժոխք:
Ըստ Արամ Սարգսյանի՝ մենք համակարգի խնդիր ունենք: Այս առիթով մանրամասնեց. «Այն համակարգը, որը ձևավորվել է այս 30 տարվա ընթացքում, դասականի ասած՝ խիյարը ծուռ է աճել: Խիյարը ծուռ է աճել ոչ թե այն պատճառով, որ խիյարնա վատ, այլ սերմնացուն է սխալ ընտրվել: Ով ցանել է, ինքն է դրա մեղավորը: Ամբողջ երեսուն տարվա ընթացքում և սրա շարունակությունը նույն բանն է ցույց տալիս: Գտնում ենք, որ սերմնացուն էլ պետք է փոխել»:
Արամ Սարգսյանն ասաց՝ իրենք այս իշխանությանը հեռացնելու կողմնակիցն են. «Մենք կմասնակցենք բոլոր այն հավաքներին, որոնց նպատակն այս իշխանություններից ձերբազատվելն է: Բայց մենք ունենք ուրույն ճանապարհ, որը հայահավաքն է»:
Խոսելով փետրվարի 20-ին կայանալիք հանրահավաքի մասին՝ «Հայահավաքի» կազմկոմիտեի ներկայացուցիչ Տիգրան Չոբանյանն ասաց. «Փետրվարի 20-ին կայանալիքը մենք համարում ենք ոչ թե հանրահավաք, այլ հայահավաք, քանի որ անկախ նրանից՝ մարդիկ որքանով են ընդունում, չեն ընդունում, կամ դրա մեջ են, թե՝ դուրս, իրենք այդ հայահավաքի մաս են կազմում»:
Տաթև ՀԱՐՈՒԹՅՈՒՆՅԱՆ
