«Ռազմագերիների հարցի լուծման եղանակը շատ պարզ է. պետք է բոլոր տեսակի բանակցությունները դադարեցնել, մանավանդ տարածքային հարցերի շուրջ, եւ ասել՝ հարգելիներս, կլուծվի ռազմագերիների հարցը, կանցնենք հաջորդ փուլին: Նույնիսկ եթե իրենք ռազմագերիներին համարում են ահաբեկիչներ, կարող են համաներում կիրառել եւ ազատ արձակել: Դա կախված է քաղաքականությունից»,- այսօր «Զարթոնք» ազգային-քրիստոնեական նախաձեռնության ասուլիս-քննարկման ժամանակ ասաց արդարադատության նախկին նախարար Գեւորգ Դանիելյանը՝ անդրադառնալով գերիների չլուծվող հարցին:
Նախկին պաշտոնյայի գնահատմամբ, Հայաստանում ձեւավորված իրավաքաղաքական մշակույթը հնարավորություն չի տալիս ավելի լավ աշխատելու. ընդունվում են հակաժողովրդական օրենքներ՝ ներկայացվելով ժողովրդին հաճո ձեւակերպումներով: «Եթե դուք դատարանի անկախությունը ոտնահարող օրենք եք ընդունում, կամ, ասենք ՍԴ-ի փոփոխությունները կապակցում եք ներդրումների հետ, դրա ի՞նչն է, եթե ոչ պոպուլիզմ» -ասաց նա:
Նելլի ԳՐԻԳՈՐՅԱՆ
