Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանի ընթացքում հեռավար կարգով ելույթ ունեցավ Գերմանիայի կանցլեր Անգելա Մերկելը և պատասխանեց պատվիրակների հարցերին:
Իր ելույթում Անգելա Մերկելը մի քանի շեշտադրումներ արեց: Մասնավորապես նա մտահոգություն հայտնեց, որ Թուրքիան դուրս է եկել կանանց պաշտպանությանն ուղղված «Ստամբուլյան կոնվենցիայից»:
Հիշեցնենք՝ Թուրքիայի նախագահ Ռեջեփ Թայիփ Էրդողանը մարտի 20-ին հրապարակեց որոշումը:
Անգելա Մերկելը հայտարարեց. «Կանանց իրավունքները մարդու իրավունքներ են, կանանց իրավունքները չպետք է անտեսվեն»:
Կարդացեք նաև
Նա նաև հայտարարեց՝ Եվրոպայի խորհուրդը պետք է ահազանգի, երբ ԵԽ անդամ պետությունը խախտում է մարդու հիմնարար իրավունքները:
Անգելա Մերկելը նաև շեշտեց՝ մարդու հիմնարար իրավունքները, որոնք ամրագրված են եվրոպական կոնվենցիաներով՝ վեր են ազգային օրենսդրություններից:
Նա նաև դժգոհություն հայտնեց, որ որոշ անդամ պետություններ չեն կատարում Մարդու իրավունքների եվրոպական դատարանի (ՄԻԵԴ) որոշումները: Այս առիթով ասաց. «Մարդու իրավունքների եվրոպական դատարանի որոշումներից անդամ պետությունների կողմից հրաժարվելը դատապարտելի է»:
Տաթև ՀԱՐՈՒԹՅՈՒՆՅԱՆ
