ՀՀ ԱԺ տնտեսական հարցերի մշտական հանձնաժողովն ապրիլի 28-ի նիստում քննարկեց «Ավտոմոբիլային տրանսպորտի մասին» օրենքում եւ կից փաթեթում նախատեսվող փոփոխությունն ու լրացումները, որոնք նախաձեռնել է Կառավարությունը:
ՀՀ տարածքային կառավարման եւ ենթակառուցվածքների նախարարի տեղակալ Արմեն Սիմոնյանի խոսքով` առաջարկվում է սահմանել վարորդների օրական ու շաբաթական հանգստի եւ աշխատանքի ժամանակահատվածները: Նախատեսվում է նաեւ թվային տախոգրաֆի համակարգը կիրառել ընդհանուր օգտագործման ուղեւորափոխադրումներ եւ բեռնափոխադրումներ իրականացնող տրանսպորտային միջոցներում: Կլինեն նաեւ բացառություններ, որոնց դեպքում չի կիրառվելու թվային տախոգրաֆի համակարգը:
Նշվեց նաեւ, որ ՀՀ-ԵՄ Համապարփակ եւ ընդլայնված գործընկերության համաձայնագրի կիրարկման ճանապարհային քարտեզով նախատեսվում է տրանսպորտի ոլորտը կանոնակարգող օրենսդրությունը ներդաշնակեցնել ԵՄ օրենսդրության պահանջներին: ՀՀ օրենսդրությունը կհամապատասխանեցվի «Միջազգային ավտոճանապարհային փոխադրումներ կատարող տրանսպորտային միջոցների անձնակազմի աշխատանքի մասին» համաձայնագրի պահանջներին:
Քննարկման արդյունքում նախագծերի փաթեթը ստացավ դրական եզրակացություն:
ՀՀ Ազգային ժողով
