«Սյունիքում սահմանն ինչպե՞ս է ապահովվում։ Ես եղել եմ այնտեղ, ճանապարհը բաց է, թուրքն է, մենք ենք․․․անհասկանալի վիճակ է։ Ժողովրդի անվտանգություն ինչպե՞ս եք ապահովելու, մինչեւ հստակ սահմանը գծվի։ Պարզ ասեմ՝ թաքցնելու բան չկա, այնտեղ ամեն պահի թուրքը կարող է ճանապարհից մարդ տանի։ Պետք է մի հատ նման դեպք լինի, նոր մտածե՞նք»,-ԱԺ պաշտպանության եւ անվտանգության հարցերի հանձնաժողովում այսօր ՀՀ «Պետական սահմանի մասին» օրենքում փոփոխությունների օրինագծի քննարկման ժամանակ ԱԱԾ պետի տեղակալ, գեներալ-լեյտենանտ Ստեփան Մելքոնյանից հետաքրքրվեց «Իմ քայլի» պատգամավոր, «Երկրապահ կամավորականների միության նախագահ» Սասուն Միքայելյանը։
Ստեփան Մելքոնյանը տեղեկացրեց, որ Սյունիքի սահմանին ծառայում են ՀՀ սահմանապահ զորքերը․ «Նպատակն է ապահովել մարդկանց անվտանգությունը։ Հասկանալի է, որ սահմանային բնագիծը դեռ չկա, հակառակորդի մոտ էլ նույն վիճակն է, եւ շատ դեպքերում հարցեր են ծագում, որոնք օպերատիվ միջամտություն են պահանջում։ Գորիս-Կապան ճանապարհն է բարդ, որովհետեւ մի քանի անգամ այն մտնում է ադրբեջանական տարածք։ Այդտեղ ռուսական սահմանապահ զորքերի հենակետեր կան, եւ համատեղ են գործում, եթե կոնֆլիկտային վիճակներ են լինում»։
Սասուն Միքայելյանն ի պատասխան օրինակ բերեց․ «Վերջին անգամ հետ գալուց մեքենայի անիվը թողեց, երկու ժամ կանգնել եմ։ Սահմանապահ չեմ տեսել, ոչ էլ ռուսական բանակից եմ տեսել։ Հարյուր մետր այն կողմ թուրքերն են։ 90-ականներին թուրքերը մի քանի անգամ մարդ են տարել»։
Կարդացեք նաև
Լուիզա ՍՈՒՔԻԱՍՅԱՆ
