«Հայ ժողովուրդը 2018-ին վարչապետ չի ընտրել, հայ ժողովուրդը 2018-ին կուսակցությունների մեջ ընտրել է իրենց համար նախընտրելի կուսակցություն: Կուսակցության մեջ եղել են բազմաթիվ անձինք»,- այսօր Սահմանադրական դատարանում «Հայաստան» դաշինքի ներկայացուցիչ Արամ Վարդեւանյանը այսպես պատասխանեց ՍԴ դատավոր Վահե Գրիգորյանի հարցին, թե ինչո՞ւ պետք է սահմանադիրը առաջնորդվեր այն տարբերակով, որ ժողովրդավարությամբ ընտրված լեգիտիմ պաշտոնյան հրաժարականից հետո չպետք է պաշտոնավարեր:
Վարդեւանյանը պնդեց, որ ժողովուրդը ընտրել է «Իմ քայլը» խմբակցությունը, փոխվարչապետերից առնվազն եւս մեկը նույն կերպ ընտրված է եղել: Նա ասաց, որ ցուցակի առաջին համարը մեխանիկորեն չի նշանակում, որ լինելու է վարչապետ: Ըստ Վարդեւանյանի, մի նժարի վրա ժողովրդավարությունն է, մյուս նժարի վրա՝ իրավական պետության սկզբունքը: Պետք է իսպառ բացառվի իրավական պետության սկզբունքի խախտումը. «Այն, որ պետք է փոխվարչապետը պաշտոնավարի, դա ե՛ւ իրավական, ե՛ւ ժողովրդավարական մոդել է»:
Վարդեւանյանը եւս մեկ անգամ պնդեց. «Նիկոլ Փաշինյանը վարչապետ չի ընտրվել, նշանակվել է ՀՀ նախագահի կողմից հաշվի առնելով խորհրդարանական մեծամասնության դիրքորոշումը»:
Կարդացեք նաև
Հիշեցնենք, որ այսօր 5-րդ օրն է, ինչ Սահմանադրական դատարանը շարունակում է քննել 20.06.2021թ.-ի արտահերթ խորհրդարանական ընտրությունների արդյունքների վիճարկման հարցը՝ 4 քաղաքական ուժերի՝ «Հայաստան» եւ «Պատիվ ունեմ» դաշինքների, «Զարթոնք» եւ «Հայոց հայրենիք» կուսակցությունների դիմումի հիման վրա:
Վարդեւանյանը հիշեցրեց, որ Հայաստանն այս իրավիճակում նույնիսկ արտաքին գործերի նախարար, փոխնախարար չունի ու փորձում է հաղթահարել:
Հռիփսիմե ՋԵԲԵՋՅԱՆ
