ԱՄՆ-ի պետքարտուղարությունը պատասխանել է կադրային նշանակումների վերաբերյալ «Ամերիկայի ձայն»-ի հայկական ծառայության հարցին
ԱՄՆ-ի պետքարտուղարությունը տեղեկացրել է՝ Էրիկա Օլսոնը ստանձնել է Կովկասի, տարածաշրջանային հակամարտությունների և Հարավային Եվրոպայի հարցերով փոխպետքարտուղարի տեղակալի պաշտոնը:
Մինչ այս նշանակումը նա զբաղվել է Հյուսիսային Եվրոպայի, Բալթյան երկրների և Արկտիկայի հարցերով, ինչպես նաև աշխատել է Անկարայում ԱՄՆ-ի դեսպանատանը որպես տնտեսական հարցերով խորհրդական:
«Այս պաշտոնյաները միացել են գերատեսչության Եվրոպայի և Եվրասիայի հարցերով բյուրոյին պետքարտուղարության դիվանագիտական նշանակումների բնականոն գործընթացի ներքո»,- նշել է ԱՄՆ պետքարտուղարության մամլո ծառայությունը իր գրավոր պատասխանում:
Կարդացեք նաև
Բացի Օլսոնից, ըստ պետքարտուղարության, Եվրոպայի և Եվրասիայի հարցերով բյուրոյի նոր նշանակումներն են դեսպան Դերեկ Հոգանը՝ որպես փոխպետքարտուղարի գլխավոր տեղակալ, Ռոբին Դանիգանը ՝ որպես Կենտրոնական և Արևելյան Եվրոպայի հարցերով փոխպետքարտուղարի տեղակալ և Գաբրիել Էսկոբարը՝ որպես Հարավային Կենտրոնական Եվրոպայի և հանրային դիվանագիտության ու մամուլի հարցերով փոխպետքարտուղարի տեղակալ:
«Մենք ոգևորված ենք այս անձանց նշանակման կապակցությամբ, քանի որ նրանք հսկայական փորձառություն և որակ են հաղորդում Եվրոպայի և Եվրասիայի հարցերով բյուրոյի ղեկավար կազմին»,- նշել է պետքարտուղարության մամլո ծառայությունը:
Արամ ԱՎԵՏԻՍՅԱՆ
