Կառավարությունն այսօր նիստում որոշում կայացրեց սահմանափակել e-gov.am եւ govtravel.am կայքերից բաց տեղեկատվություն ստանալու հնարավորությունը՝ պատճառաբանելով անվտանգային խնդիրները: Ըստ նախագծի, 2020 թվականի սեպտեմբերի 27-ին հակառակորդի կողմից սանձազերծած պատերազմով պայմանավորված՝ ուսումնասիրության արդյունքում վեր են հանվել ծավալուն նյութեր, որոնք վերաբերում են կայքերում առկա բաց եւ ուղիղ հասանելիությամբ տեղադրված պետական տեղեկություններին:
«Ուսումնասիրող կողմերը եկել են այն մասնագիտական եզրակացության, որ ռազմավարական նշանակության եւ կարեւորության պետական տեղեկատվություն է տեղադրվում կայքերում պարզ հասանելիությամբ եւ երրորդ կողմի երկրների կամ կազմակերպությունների կողմից այն կարող է օգտագործվել տարբեր տնտեսական, քաղաքական եւ այլ վերլուծություններում՝ ի վնաս ՀՀ պետական շահի»,-ասված է նախագծում:
Հիշեցնենք, որ, մասնավորապես` govtravel.am կայքում զետեղված է պաշտոնատար անձանց գործուղումների՝ ավիատոմսերի ամրագրման եւ դուրս գրման վերաբերյալ տեղեկատվություն:
Այս պահին govtravel.am կայքն արդեն սահմանափակումով է գործում:
Կարդացեք նաև
Նախագծից նաեւ տեղեկանում ենք, որ հրապարակված տեղեկատվության ծավալից ընտրվել է այն անհրաժեշտ նվազագույնը, որպեսզի հնարավորինս չխախտվի պետական կառավարման համակարգի գործունեության հրապարակայնությունը եւ բացառվի ռիսկային, զգայուն տեղեկատվության ուղիղ հասանելիությունը:
Ինչ վերաբերում է տեղեկատվություն ստանալու սահմանափակմանը, կառավարությունը հորդորում է համապատասխան տեղեկությունների ստացումն իրականացնել հարցման եղանակով, մասնավորապես՝ «Տեղեկատվության ազատության մասին» օրենքի շրջանակներում:
E-gov.am կայքում էլ փոփոխություն է կատարվել «Ռեեստրներ եւ ցանկեր» բաժնում, որտեղ տեղադրվում է արտադրական վտանգավոր օբյեկտների ռեեստրը, որը թարմացվում է յուրաքանչյուր ամսվա համար` Հայաստանի Հանրապետության արտակարգ իրավիճակների նախարարության կողմից: Տեղեկատվությունը պարունակում է արտադրական վտանգավոր օբյեկտի նկարագիրը, շահագործող անձի անունը, գտնվելու վայրը, գրանցման ամսաթիվը, պետական ռեգիստրի համարը:
Մեկ այլ կետով էլ նշյալ կայքում տեղադրվում են ընդերքի պաշարների մասին տեղեկանքները, որոնք թարմացվում են Հայաստանի Հանրապետության էներգետիկայի եւ բնական պաշարների նախարարության կողմից: Ընդերքի պաշարների վերաբերյալ տեղադրվում են օգտակար հանածոների արդյունահանման համար տրամադրված հանքային իրավունքների, օգտակար հանածոների ուսումնասիրության համար տրամադրված հանքային իրավունքների եւ ստորերկրյա ջրերի հանքաարդյունահանման համար տրամադրված հանքային իրավունքների մասին տեղեկանքները»:
Լուսինե ԲՈՒԴԱՂՅԱՆ
