«Եթե տնտեսական ինտեգրումը տնտեսական փոխշահավետության սկզբունքով է, միանշանակ դրական է: Բայց այստեղ ի՞նչ փոխշահավետության մասին է խոսքը: Որեւէ մեկը կա, որ մտածում է՝ Թուրքիան ու Ադրբեջանն ուզում են Հայաստանի տնտեսությունը զարգանա՞, Հայաստանը բարգավաճի, ունենա տնտեսական աճ, հզորանա՞ եւ իր խնդիրները, այդ թվում եւ պատմական, դնի՞: Սա տնտեսական ներխուժման դասական ձեւ է»,-այսօր «Հայելի» ակումբում կազմակերպված ասուլիսում ասաց «Հայաստան» խմբակցության պատգամավոր Թադեւոս Ավետիսյանը:
Նրա խոսքով, Հայաստանի տնտեսությունը եւ արտահանումը ո՛չ Թուրքիայում, ո՛չ Ադրբեջանում որեւէ մրցակցություն չունի այս պահին. «Դրանք չնչին տոկոսներ են եւ դա երեւում է նախորդ տաս-քսան տարիների վիճակագրությունից: Բայց թուրքական, ադրբեջանական ապրանքները մեծ մրցունակություն ունեն եւ արագ գրավելու են ՀՀ շուկան՝ ոչ միայն այլ երկրների ներմուծումը դուրս մղելով եւ մեզ տնտեսական կախվածության մեջ գցելով, այլ, նաեւ տեղական արտադրության հաշվին»:
Ըստ պարոն Ավետիսյանի, մարդիկ գումարներ են ծախսել ջերմոցային տնտեսություններ են հիմնել, կամ, թուրքական ապրանքների ներմուծման փոխարինումը ապահովելու համար տարբեր արտադրություններ են դրել՝ այդ թվում թեթեւ արդյունաբերության ոլորտում՝ հույս ունենալով այդ ապրանքներն արտադրել եւ զարգացնել իրենց տնտեսությունը. «Հիմա, այն ինչ որ առաջարկվում է եւ արվում է, դրա հետեւանքով, այդ մարդիկ ոչ միայն կորցնելու են իրենց ներդրումները, այլեւ, փակվելու են նաեւ տեղական աշխատատեղերը, եւ, ըստ էության, մենք, ամբողջությամբ, նաեւ տնտեսական կախվածության մեջ ենք ընկնելու: Այն էլ, տեսեք, ումից»:
Լուսինե ԲՈՒԴԱՂՅԱՆ
