Խոշորացված Ամասիա համայնքի ՏԻՄ ընտրություններին մասնակցած «Քաղաքացիական պայմանագիր» կուսակցության թեկնածուներն ու նրանց համակիրները շարունակում են բողոքի ցույցերը։
Նրանք երեկ բողոքի ցույց են անցկացրել Արփի համայնքի նախկին վարչական կենտրոնում՝ Բերդաշենում՝ հայտարարելով, որ հրաժարվում են Արփիի համայնքապետարանի փաստաթղթերը հանձնել Ամասիա խոշորացված համայնքի նորընտիր ղեկավար Ջեմմա Հարությունյանին։
Ինչպես հայտնի է, ՔՊ-ն հրաժարվել էր իրեն հասանելիք 6 մանդատներից, և Ամասիա խոշորացված համայնքի տեղական իշխանությունը ձևավորել էր ՀՀԿ-ի և «Արփի Ամասիա» նորաստեղծ դաշինքի միջոցով, համայնքապետ ընտրվել էր «Արփի Ամասիա» դաշինքի թեկնածու Ջեմմա Հարությունյանը։
ՔՊ-ի թեկնածու Մերգել Ղարիբյանը, որը նախքան Ամասիայի խոշորացումը, Արփի համայնքի ղեկավարն էր, մեզ հետ զրույցում ասաց, որ իրենք չեն ընդունում ընտրությունների արդյունքները, այդ պատճառով դիմել են վարչական դատարան, դատարանը չի բավարարել իրենց հայցը, պատրաստվում են Վերաքննիչ դատարան բողոք ներկայացնել։
Կարդացեք նաև
Նա նաև նշեց, որ երեկ բողոքի ցույց են անցկացրել Բերդաշենում, քանի որ իրենց ձայն տված բնակիչները համաձայն չեն փաստաթղթերը հանձնել, նրանք գտնում են, որ 9 մանդատով չէր կարող իշխանություն ձևավորվել, իսկ ՔՊ-ն ամենաշատ ձայներն էր ստացել ընտրություններում։
Ամասիա խոշորացված համայնքի ղեկավար Ջեմմա Հարությունյանն էլ Aravot.am-ի հետ զրույցում տեղեկացրեց, որ դիմել է ոստիկանություն, որպեսզի ապահովեն Արփի համայնքապետարանի փաստաթղթերի հանձնում-ընդունումը։
Հիշեցնենք, որ Ամասիա խոշորացված համայնքի ՏԻՄ ընտրություններին մասնակցում էին երեք քաղաքական ուժեր՝ ՀՀԿ-ն, որը ստացավ երեք մանդատ, «Արփի Ամասիա» նորաստեղծ դաշինքը, որը ստացավ վեց մանդատ և որի թեկնածուն՝ Ջեմմա Հարությունյանն ընտրվեց համայնքապետ։
ՔՊ-ն, որը 16 ձայնով առավել էր «Արփի Ամասիա» նորաստեղծ դաշինքից, ևս վեց մանդատ էր ստանալու, սակայն հրաժարվեց մանդատներից։ ՔՊ-ականները պնդում էին, որ իրենք պիտի ստանձնեին համայնքապետի պաշտոնը, այդ պատճառով էլ ինքնաբացարկ ներկայացրեցին, հրաժարվեցին մանդատներից՝ հուսալով, որ նոր ընտրություններ կանցկացվեն Ամասիայում։
Սակայն թիվ 30 ընտրատարածքային հանձնաժողովը մերժեց նրանց պահանջը, վարչական դատարանը ևս մերժել է, այժմ դիմել են Վերաքննիչ դատարան։
Նունե ԱՐԵՎՇԱՏՅԱՆ
