«Հասարակությունն այս հարցի շուրջ պետք է ընդվզի եւ իր հստակ գնահատականը տա ստեղծված իրավիճակին։ Մենք չենք եկել այստեղ, որ պաշտպանենք կոնկրետ ինչ-որ դատավորի, կամ կոնկրետ գործ, մենք եկել ենք այստեղ խոսելու եւ պաշտպանելու արդարադատությունը։ Մենք չպետք է թույլ տանք, որ Հայաստանը վերածվի բռնապետության, իսկ մենք տեսում ենք, որ ՀՀ իշխանությունները երկիրը տանում են այդ ուղղություն»,-այսօր այս մասին լրագրողների հետ զրույցում ասաց «Հայրենիք» կուսակցության նախագահ եւ ԱԺ-ում «Պատիվ ունեմ» խմբակցության ղեկավար Արթուր Վանեցյանը, որը ընդդիմադիր մի շարք գործիչների, պատգամավորների եւ փաստաբանների հետ գտնվում էր Երեւանի ընդհանուր իրավասության դատարանի Աջափնյակի նստավայրի բակում։
Այս դատարանում այսօր քննվում է Սյունիքի մարզի առաջին ատյանի ընդհանուր իրավասության դատարանի դատավոր (լիազորությունները կասեցված են) Բորիս Բախշիյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։
Ըստ Վանեցյանի, այս գործընթացներով իշխանությունը հստակ «մեսիջ է» ուղարկում դատական իշխանությանը, որ եթե չեն կատարում իշխանության ցանկությունը, ապա պատժվելու են․ «Բոլորս պետք է հստակ գնահատական տանք տեղի ունեցող գործընթացներին, որպեսզի այս երկրում գոնե դատական իշխանությունը գործի անկախ եւ չկատարի իշխանությունների քմահաճույքը»։
Կարդացեք նաև
Նելլի ԲԱԲԱՅԱՆ
