Նիկոլ Փաշինյանը կանչվելո՞ւ է 44-օրյա պատերազմի հանգամանքներն ուսումնասիրող քննիչ հանձնաժողով. այսօր այս հարցին ի պատասխան՝ հանձնաժողովի նախագահ Անդրանիկ Քոչարյանն ասաց. «Անպայմա՛ն: Դա Նիկոլ Փաշինյանի ցանկությունն է: Եվ ոչ միայն Նիկոլ Փաշինյանը: Բա նման հնարավորությունը մեր ընդդիմադիր գործընկերները ո՞նց իրենց ձեռից բաց թողեցին, այն էլ ո՜նց, քանի ժամ ուզում էին, ինչ հարց ուզում էին: Այսպիսի հնարավորություն Տիգրան Աբրահամյանը կամ մյուս գործընկերները երբեւիցե կունենայի՞ն»:
Հիշեցնենք, որ այսօր 2020-ի սեպտեմբերի 27-ին սանձազերծված 44-օրյա պատերազմի հանգամանքներն ուսումնասիրող քննիչ հանձնաժողովի առաջին նիստն էր: «Հայաստան» եւ «Պատիվ ունեմ» խմբակցությունները հայտարարություն են տարածել, որ չեն մասնակցելու այդ հանձնաժողովի աշխատանքներին:
Հարցին՝ 44-օրյա պատերազմին Արծրուն Հովհաննիսյանը ՊՆ ներկայացուցիչն էր, հիմա քննիչ հանձնաժողովում ներգրավվել է՝ որպես փորձագե՞տ՝ Անդրանիկ Քոչարյանը պատասխանեց, որ նա իսկապես փորձագետ է ու աշխատում է շատ արդյունավետ. «Արծրուն Հովհաննիսյանը տնօրինում է շատ մեծ տեղեկատվության, նա որպես ՊՆ ինֆորմացիայի կրող՝ շատ արժեքավոր է լինելու մեր հանձնաժողովի աշխատանքների ընթացքում»:
Կարդացեք նաև
Հռիփսիմե ՋԵԲԵՋՅԱՆ
