Հայաստանի մարդու իրավունքների առաջին պաշտպան Լարիսա Ալավերդյանը «Հայելի» ակումբում խոսելով Եվրանեսթի նիստերին մասնակցելու նպատակով Ադրբեջանի պատգամավորների Հայաստանում գտնվելու մասին՝ ասաց. «Հիշեցնեմ, որ 2015 թվականին ադրբեջանցիները նմանատիպ նիստին հրաժարվել են գալ: Իսկ այս մեկին գալով նրանք ուղղակի ուզում են ամրապնդել իրենց հաղթող լինելը: Եվ կեցվածքն էր այդպիսին: Կոմիտեներից մեկի նիստը ղեկավարում էին միլի մեջլիսի պատգամավորները, որոնք փետրվարի 1-ին վավերացրել էին «Շուշիի հռչակագիրը», որտեղ ուղղակի բաց տեքստով գրված են բոլոր պարտադրանքները, որոնք մինչեւ անգամ նախապայման չեն, եւ որոնք պետք է Հայաստանը կատարի եւ համապատասխանի այդ այսպես կոչված խաղաղության օրակարգը ուժի մեջ մտնելուն: Ես դա ասում եմ թուրքական, որովհետեւ զուգահեռներ կան, երբ 1918 թվականին Թուրքիան համագործակցության պայմանագիր է կնքել Հայաստանի եւ Ադրբեջանի հետ ու դրանից հետո մտել է Հայաստան եւ Ադրբեջանի հետ սկսել ցեղասպանություն իրականացնել Արեւելյան Հայաստանում: Հետեւաբար, ոչ Թուրքիան, ոչ Ադրբեջանը կասկածելու տեղ չեն թողնում, որ իրենք մեզ տեսնում են ոչ միայն թշնամի, այլ անվանում են գազաններ: Այս խոսքն է օգտագործում Իլհամ Ալիեւը»,-ասաց տիկին Ալավերդյանը եւ իր ցավն ու զարմանքը հայտնեց նրանց մասին, ովքեր իր խոսքով մինչեւ հիմա չեն հասկանում կամ ձեւացնում են, թե ինչ է անում օրվա իշխանությունը Հայաստանում:
Աշոտ ՀԱԿՈԲՅԱՆ
