«Ուզում եմ օգտվել այն առիթից, քանի մեր ընդդիմությունը այստեղ է, եւ մի երկու հարց քննարկել: Նախ` պարոն Վարդեւանյան, երեկ մեկ-երկու հարց բարձրացրիք, թե ինչու մենք չընդունեցինք այն նախագծերը, որոնք որակեցիք ընդդիմության կողմից բերված, խոսքը մասնավորապես թոշակի տրման նախագծին է վերաբերվում»,-ընդդիմադիրներին դիմեց ԱԺ առողջապահության հարցերի հանձնաժողովի փոխնախագահ Լուսինե Բադալյանը, ապա հավելեց, որ նույն նախագծերը 7-րդ գումարման ԱԺ-ի շրջանակներում իրենք էին բերել ու մերժել: Նա փորձեց հիմնավորել, որ այս պարագայում ընդդիմության եւ իշխանության հարց չկա, պարզապես եթե կառավարությունը ի վիճակի չի լինում իրականացնել այդ նախագծերը, մերժում է:
Անդրադարձ եղավ նաեւ ԱԺ-ում Փաշինյանի՝ պատգամավորների հետ կոպիտ խոսելուն, որը ընդդիմադիրների կողմից որակվել էր որպես քաղաքական ինստիտուտների ոտնահարում:
«Ինչպե՞ս է ստացվում, որ երկրի առաջին դեմքին՝ ձեր երկու խմբակցություններին միասին վերցրած երկու անգամ շատ ձայն ստացած վարչապետին ամենօրյա ռեժիմով այստեղից վիրավորելը քաղաքական ինստիտուտների ոտնահարում չէ, պետության ոտնահարում չէ, բայց մի քիչ բարձր տոնով պատգամավորների հետ խոսելը պետության ոտնահարում է: Առաջարկում եմ այսպես պայմանավորվել՝ կամ որոշում ենք ընդունում պաշտոնապես, որ այլեւս որեւէ մեկը ոչ այս, ոչ այն կողմից ոչ մեկի չի վիրավորում, կամ էլ ինչպիսի բարեւ, այդպիսի պատասխան: Դա պետք է ընդունենք երկու կողմերս էլ: Էնպես չլինի, որ ձեզ կարելի է ինչ տոնայնությամբ, ինչ բառապաշարով խոսեք, դա նորմալ լինի, բայց այս թեւից խոսելը չի կարելի»,-ասաց Լուսինե Բադալյանը:
Գոհար ՀԱԿՈԲՅԱՆ
