«Արդեն տեւական ժամանակ է `ընդդիմությունը չի մասնակցում նիստերին, եւ հերթական անգամ ստացել են իրենց աշխատավարձերն՝ իրենց օգնականներով, եւ որքանով ես տեղյակ եմ, որևէ մեկը չի հրաժարվել»,-այսօր ԱԺ արտահերթ նիստում իր ելույթում ասաց ՔՊ պատգամավոր Սիսակ Գաբրիելյանը։
«Շատերն ասում են՝ ինչո՞ւ չեք անդրադառնում ընդդիմությանը։ Սիրելի քաղաքացիներ, ախր այս ընդդիմությունն ինքն իր խոսքով իրեն, ինչպես իրենց առաջնորդն է ասում, մաշեցրել է, եւ ես նույնիսկ խորը կասկած ունեմ, թե ուր են հասել»,-ասաց Գաբրիելյանը։
Նա անդրադառնալով ընդդիմության՝ դուրս եկեք փողոց, որպեսզի թուրքը չգա մեր երկիր, ուղերձին, մեջբերեց իր լրագրողական նյութից մի հատված․«Դպրոցի բացման ժամանակ մի բարձրաստիճան պաշտոնյա արել է հետեւյալ արտահայտությունը՝ ես անկեղծորեն ցանկանում եմ, որ այս դպրոցում սովորեն նաեւ ադրբեջանցի երեխաներ, ես վստահ եմ, որ այդ օրը գալու է, եւ ցանկանում եմ, որ այդ օրը գա հնարավորինս շուտ․ 2014 թվական, Սերժ Սարգսյան։ Հիմա հարգելի պարոն Վանեցյան, երբ դուք դռնեդուռ ընկած ասում եք՝ ժողովուրդ դուրս եկեք փողոց, որպեսզի թուրքը չգա այս երկիր, դուք խափանո՞ւմ եք Սերժ Սարգսյանի երազանքը։ Կամ որ Իշխան Սաղաթելյանը հայտարարում է, որ թալանը հետ են բերելու, դուք հասկանո՞ւմ եք, որ խոստովանում են, որ թալանը եղել է, եւ որ թալանը հետ են բերելու։ Հետ բերել նկատի ունեք ձե՞զ եք հետ բերելու, որովհետեւ մենք խոստացել ենք, որ հետ ենք բերելու պետական բյուջե։ 2018-ին ՀՀ քաղաքացիները փակել են ձեր թալանի ծորակի փականը եւ հիմա շատ խորը գործընթաց է գնում այդ թալանը պետական բյուջե վերադարձնելու համար»։
Ապա Գաբրիելյանն առաջարկեց խորհրդարանում քննարկում կազմակերպել գլխավոր դատախազի եւ հակակոռուպցիոն գծով տեղակալի հետ, որպեսզի հանրությանը տեղեկացնեն, թե որ անձանց գործերն են գնացել դատարան․ «Մոտ 80 մլրդ դրամի մասին է խոսքը, եւ երեկ փողոց էին փակում այդպիսի մարդկանց երեխաները, որոնց ծնողները կալանավորված են այդ ապօրինի գործերով»։
Կարդացեք նաև
Նելլի ԲԱԲԱՅԱՆ
