Վերջին մի քանի ամսում պաշտոնյաներին հրապարակային ծանր վիրավորանք հասցնելու մի շարք գործերի դիտարկումից ակնհայտ է, որ դրանց զգալի մասը վերաբերում է վարչապետին ու նրա ընտանիքին, քաղաքական թիմի այլ անդամներին սոցցանցում վիրավորելու դեպքերին։ Օրինակ, ՀՀ քաղաքացի Նարինե Ադամյանին մեղադրանք է առաջադրվել հանրորեն վտանգավոր այն արարքի կատարման համար, որ նա, անձի հանրային գործունեությամբ պայմանավորված, հրապարակային եղանակով ծանր վիրավորանք պարունակող նյութեր է տարածել։ «Առավոտ»-ը Datalex դատական տեղեկատվական համակարգից տեղեկացավ, որ Նարինե Ադամյանը 2022թ.-ի փետրվարի 16-ին «Ֆեյսբուք» սոցիալական ցանցում իրեն եւ ամուսնուն՝ Ռաֆայել Ադամյանին պատկանող կայքէջով «Ռոբերտ Քոչարյանի աջակիցներ» անվամբ խմբի էջում տեղադրված՝ ՀՀ վարչապետի կնոջ՝ Աննա Հակոբյանի լուսանկարի տակ հրապարակային գրել է մի շարք մեկնաբանություններ։ Ըստ մեղադրանքի՝ նման արտահայտություններով Նարինե Ադամյանը հրապարակայնորեն ծայրահեղ անպարկեշտ եղանակով վիրավորել է Աննա Հակոբյանի արժանապատվությունը եւ այդ կերպ Աննա Հակոբյանին, իր հանրային գործունեությամբ պայմանավորված, հասցրել է ծանր վիրավորանք։
Նարինե Ադամյանին մեղսագրվում է հանցավոր արարքի կատարում, որը նախատեսված է ՀՀ քրեական օրեսնգրքի 137.1 հոդվածի(ծանր վիրավորանք) 2-րդ մասի 1-ն եւ 2-րդ կետերով(անձի վերաբերյալ ծանր վիրավորանք պարունակող նյութեր տարածելը, որը կատարվել է տեղեկատվական կամ հաղորդակցական տեխնոլոգիաներն օգտագործելով կամ հրապարակային այլ եղանակով, եւ որը կատարվել է՝ անձի հանրային գործունեությամբ պայմանավորված)։ Նշենք, որ ըստ քրեական օրենսգրքի 137.1 հոդվածի՝՝ հանրային գործունեություն է համարվում անձի կողմից լրագրողական, հրապարակախոսական գործունեության, ծառայողական պարտականությունների կատարման, հանրային ծառայության կամ հանրային պաշտոն զբաղեցնելու, հասարակական կամ քաղաքական գործունեության հետ կապված վարքագիծը: Այս գործն Արմավիրի մարզի ընդհանուր իրավասության դատարանում է, այն 02-06-2022թ.-ին մակագրվել է դատավոր Հրաչյա Մեխակյանին։ Մեղադրյալ Նարինե Ադամյանը նախկինում դատվածություն չի ունեցել։ Նրա հանդեպ խափանման միջոց է ընտրվել ստորագրությունը երկրից չհեռանալու մասին։
Մեկ այլ քաղաքացու՝ Հովհաննես Գաբրիելյանին եւս մեղադրանք է առաջադրվել հրապարակային եղանակով ծանր վիրավորանք պարունակող նյութեր տարածելու համար։ Մասնավորապես, նա 2022թ. մարտի 4-ին «Ֆեյսբուք»-ում իրեն պատկանող կայքէջում ՀՀ վարչապետ Նիկոլ Փաշինյանի վերաբերյալ հրապարակային գրել է մի նախադասություն՝ այդպիսով հրապարակային ծայրահեղ անպարկեշտ եղանակով վիրավորելով Նիկոլ Փաշինյանի արժանապատվությունը։ Ըստ մեղադրանքի նկարագրության՝ այս կերպ Հովհաննես Գաբրիելյանը Նիկոլ Փաշինյանին, վերջինիս հանրային գործունեությամբ պայմանավորված, ծանր վիրավորանք է հասցրել։ Հովհաննես Գաբրիելյանը նախկինում դատվածություն չի ունեցել։ Այս գործը դատարան է ստացվել 02-06-2022թ.-ին եւ մակագրվել դատավոր Ադրինե Ղուկասյանին։
Այս դատավորին է մակագրվել նաեւ Անահիտ Մխիթարյանի վերաբերյալ գործը։ Նրան նույնպես նույն մեղադրանքն է առաջադրվել։ Անահիտ Մխիթարյանը, ըստ մեղադրական եզրակացության, 2022թ.-ի ապրիլի 12-ին «Ֆեյսբուք»-ում News.am կայքի էջում տեղադրված եւ ՀՀ ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանի վերաբերյալ տեսանյութի տակ գրել է մի մեկնաբանություն։ Ըստ մեղադրանքի՝ այդ կերպ Անահիտ Մխիթարյանը հրապարակայնորեն ծայրահեղ անպարկեշտ եղանակով վիրավորել է պատգամավոր Վահագն Ալեքսանյանի արժանապատվությունը եւ վերջինիս իր հանրային գործունեությամբ պայմանավորված՝ հասցրել ծանր վիրավորանք: Անահիտ Մխիթարյանը եւս նախկինում չդատված է։
Կարդացեք նաև
Իսկ 02-06-2022-ին էլ Գեղարքունիքի մարզի ընդհանուր իրավասության դատարանի դատավորներից մեկին մակագրվել է Ռաֆայել Լազյանի գործը։ Նրան մեղադրանք է առաջադրվել այն բանի համար, որ նա սոցցանցում հրապարակային եղանակով ծանր վիրավորանք է հասցրել վարչապետ Նիկոլ Փաշինյանին։
Երեւանի ընդհանուր իրավասության դատարանի դատավորներից մեկին էլ 01-06-2022-ին մակագրվել է Սարգիս Մաղդեսյանին վերաբերող գործը։ Այս քաղաքացին էլ «Ազատություն» ռադիոկայանի ֆեյսբուքյան էջից՝ 2022 թվականի մարտի 25-ին ուղղիղ եթերով հրապարակված հոդվածի մեկնաբանություններում ՀՀ ՊՆ նախարար Սուրեն Պապիկյանի վերաբերյալ կատարել է գրառում՝ հայհոյանք տարածելով, ծայրահեղ անպարկեշտ եղանակով ծանր վիրավորանք հասցնելով նախարարին։
Իսկ Հարություն Հարթենյանը 2022 թվականի մարտի 23-ին «yerevan.today» կայքի ֆեյսբուքյան էջի՝ «Փաշինյանը ԱԺ-ում է. կառավարության հարցուպատասխանի ժամ է» վերտառությամբ հոդվածի տակ կատարել է ծանր վիրավորանք պարունակող գրառում՝ ՀՀ վարչապետ Նիկոլ Փաշինյանի եւ կառավարության անդամների հասցեին հասցրել սեռական բնույթի հայհոյանքներ։ Ըստ մեղադրանքի՝ այս կերպ քաղաքացին վարչապետ Նիկոլ Փաշինյանին եւ ՀՀ Կառավարության անդամներին հասցրել է ծանր վիրավորանք՝ հայհոյանք։ Այս գործը 30-05-2022-ին մակագրվել է Շիրակի մարզի ընդհանուր իրավասության դատարանի դատավորներից մեկին։
Վերոնշյալ երեք գործերով դատական առաջին նիստերը դեռեւս նշանակված չեն։
Հրապարակման պատրաստեց
Լուիզա ՍՈՒՔԻԱՍՅԱՆԸ
«Առավոտ» օրաթերթ
04.06.2022
