Բունդեսթագի մի խումբ պատգամավորներ բաց նամակ են ուղղել ՀՀ ԱԺ նախագահ Ալեն Սիմոնյանին եւ հայ պատգամավորներին:Open Letter to the Armenian Parliament (ENG)
Նամակում Բունդեսթագի պատգամավորներն իրենց մտահոգությունն են ներկայացրել՝ հայտնելով, որ մամուլի հրապարակումներից տեղեկացել են՝ ապրիլի 16-ին վարչապետ Նիկոլ Փաշինյանին ուղեկցող ավտոշարասյան կողմից մահվան ելքով վթարի ենթարկված 28-ամյա հղի կնոջ Սոնա Մնացականյանի մահվան մասին:
Նրանք հայ պատգամավորների ուշադրությունն են հրավիրել տեղի ունեցածին՝ խնդրելով ուշադիր հետևել գործին, արդարադատություն հաստատել Սոնա Մնացականյանի և նրա ընտանիքի նկատմամբ:
«Ժողովրդավարական և քաղաքացիական հասարակության համակեցության հիմնաքարերից մեկը, որին Հայաստանը ձգտում է եւ որը պաշտպանել է նաեւ Սոնա Մնացականյանը ողջ կյանքում՝ օրենք է, որի առջև բոլոր մարդիկ հավասար են՝ անկախ նրանց կոչումից և դիրքից ներգրավված» ,- ասված է նամակում:
Կարդացեք նաև
Սոնա Մնացականյանի հայրը՝ բժիշկ Մնացական Մնացականյանն Aravot.am-ին ասաց, որ առայժմ դիմել են Բունդեսթագ, բայց առաջիկայում կդիմեն նաեւ միջազգային կառույցների:
Պարոն Մնացականյանի խոսքով, այն, որ գործով առկա տեսագրություններ են ջնջվել, իրենց մտահոգության առիթ է տալիս, որ արդարադատություն չի լինի գործով: Բացի այդ, գործի դատաքննությունն է ձգձգվում, այն դեռ չի հասել դատարան: Երեկ Սոնա Մնացականյանի հարազատները դիմել են նաեւ ՀՀ ԱԺ մարդու իրավունքների պաշտպանության հանձնաժողով:
«Ինչ է անում վրաերթի ենթարկած անձը դեպքի վայրում, որ հայտնեցին, թե դեպքից երկու ժամ անց իր մեքենայով եկել է դեպքի վայր: Ինքը կարո՞ղ է քննչական խմբի անդամ էր, որ եկել էր դեպքի վայր: Ի՞նչ գործ ուներ դեպքի վայրում, հետո ասում են՝ չի խանգարում նախաքննությանը: Լսե՞լ եք նման բան, որ վրաերթի ենթարկած անձն իր մեքենայով դեպքի վայր գա ու մասնակցի քննչական գործողություններին: Նրան պետք է բերման ենթարկեին` ոչ թե ազատ իր մեքենայով գար ու քննչական գործողություններին մասնակցեր »,- նկատեց Սոնա Մնացականյանի հայրը:
Արփինե ՍԻՄՈՆՅԱՆ