«Ամերիկայի ձայն». Միացյալ Նահանգների պետքարտուղար Էնթոնի Բլինքենը կովկասյան բանակցությունների գծով ավագ խորհրդականի պաշտոնին նշանակել է դեսպան Ֆիլիպ Թ. Ռիքերին։ Այդ կարգավիճակում դեսպան Ռիքերը կիրականացնի ԱՄՆ կողմից որպես ԵԱՀԿ Մինսկի խմբի համանախագահի և ԱՄՆ պատվիրակության գլխավոր բանակցող՝ Ժնևի միջազգային քննարկումներում այս կրիտիկական շրջանում:
ԱՄՆ պետքարտուղարության տարածած հաղորդագրության համաձայն, դեսպան Ռիքերը ունի Եվրոպայում և միջազգային կազմակերպություններում աշխատանքի հարուստ փորձ: Վերջին շրջանում նա ծառայել է Միացյալ Թագավորությունում Ամերիկայի Միացյալ Նահանգների դեսպանատանը որպես Սենտ Ջեյմսի պալատի գործերի հավատարմատար:
2019 թվականի մարտից մինչև 2021 թվականի օգոստոսը դեսպան Ռիքերը եղել է Եվրոպայի և Եվրասիայի հարցերով պետքարտուղարի օգնականի պաշտոնակատարը։ Մինչ Բյուրոն ղեկավարելը, դեսպան Ռիքերը եղել է Գերմանիայի Շտուտգարտ քաղաքում ԱՄՆ Եվրոպական հրամանատարության հրամանատարի քաղաքացիական տեղակալ և քաղաքականության հարցերով խորհրդական: Նա ավելի վաղ ծառայել է Միլանում որպես Միացյալ Նահանգների գլխավոր հյուպատոս՝ ընդգրկելով հյուսիսային Իտալիան, և եղել է Պետքարտուղարի տեղակալի օգնականը՝ կենտրոնացած Բալկանների, Կենտրոնական Եվրոպայի և Հոլոքոստի խնդիրների վրա: 2008-2011 թվականներին եղել է Հյուսիսային Մակեդոնիայում ԱՄՆ դեսպանը։
Միացյալ Նահանգները հանձնառու է օգնել Հայաստանին և Ադրբեջանին բանակցել Լեռնային Ղարաբաղի հակամարտության երկարաժամկետ քաղաքական կարգավորման շուրջ: Դեսպան Ռիքերը երկկողմանի համագործակցություն կներկայացնի համախոհ գործընկերների հետ, ինչպիսին է Եվրամիությունը, և իր դերի միջոցով՝ որպես ԵԱՀԿ Մինսկի խմբի համանախագահ, կնպաստի Հայաստանի և Ադրբեջանի միջև ուղիղ երկխոսությանը: Դեսպան Ռիքերի նշանակումն այս պահին վերահաստատում է այն կարևորությունը, որ Միացյալ Նահանգները տալիս է Վրաստանի վերաբերյալ Ժնևի միջազգային քննարկումներում։
