Հանրայինի եթերում անդրադառնալով Իլհամ Ալիեւի նոյեմբերի 8-ին հայտարարություններին ՝ Նիկոլ Փաշինյանն ասաց, թե չպետք է համակերպվել այն իրողության հետ, որ հաջորդ հանգրվանը նոր էսկալացիան է. «Ես կարծում եմ, եւ գործնականում էլ հենց դա եմ փորձում իրականացնել, որ շատ կարեւոր է նախ հասկանալ այն բովանդակությունը, որի վրա Ադրբեջանը փորձում է կառուցել նոր էսկալացիայի նախապայման: Դրա լավագույն ձեւը գույքագրելն ու ճշգրտելն է այն պայմանավորվածությունները, որոնց չկատարման մեջ Ադրբեջանը փորձում է մեղադրել մեզ»::
Փաշինյանը հավելեց. «Մենք խոսում ենք այն պայմանավորվածությունների մասին, որոնք գրավոր արձանագրված են, որովհետեւ եթե նույնիսկ կարող են լինել բանավոր քննարկումներ, դրանք պետք է արտահայտված լինեն այս կամ այն կերպ այն տեքստերում, որոնք հրապարակվում են բարձր մակարդակում ունեցած քննարկումների արդյունքում: Հետեւաբար, երեկվա իմ ելույթը հենց դրան էր նվիրված՝ փորձել գույքագրել, գույքագրելու մեջ մտնում է նաեւ ճշգրտելը՝ ինչ պայմանավորվածություններ կան:
Ես կարծում եմ, որ իմ երեկվա ելույթն արդեն ծառայել է իր նպատակին՝ այն առումով, որ այսօր Ադրբեջանի արտաքին գործերի նախարարությունը հանդես է եկել հայտարարությամբ, եւ այդ հայտարարության մեջ մեզ մեղադրում են, որ մենք Ադրբեջանի արեւմտյան շրջանների եւ Նախիջեւանի Ինքնավար Հանրապետության միջեւ կապի հաստատման գործը վիժեցնում ենք: Սա ինչով է կարեւոր, որ չնայած նրան՝ Ադրբեջանի նախագահը իր խոսույթում զարգացնում է, խոսում է խոստացված միջանցքի մասին, Ադրբեջանի արտաքին գործերի նախարարությունն արդեն միջանցք բառը չի օգտագործում շատ պարզ պատճառով. որովհետեւ արտաքին գործերի նախարարության հայտարարության հիմնական հասցեատերը միջազգային հանրությունն է…Իսկապես կարեւոր է գույքագրել՝ ինչ է պայմանավորված, ինչ է գրված տեքստերի մեջ: Եվ հենց այս ճանապարհով պետք է գնանք, որպեսզի եւ մեր, եւ միջազգային հանրությանը, հարկ եղած դեպքում՝ նաեւ Ադրբեջանի հանրությանը ճիշտ ներկայացվի՝ որոնք են պայմանավորվածությունները, եւ ով իրականում չի կատարում պայմանավորվածությունները»:
Փաշինյանի ձեւակերպմամբ. «Սրա նպատակն ամենեւին լեզվակռիվ եւ նոր էսկալացիա ստեղծելը չէ»:
Կարդացեք նաև
Գոհար ՀԱԿՈԲՅԱՆ
