«Մուրացան» բժշկական կենտրոնում նոյեմբերի 16-ին բժշկուհուն հարվածելու միջադեպը երեխային ուշ սպասարկելու պատճառով է եղել: Մեր տեղեկություններով՝ երեխայի հայրը պնդել է, որ իր երեխային հրատապ պետք է հետազոտեն, իսկ բժշկուհին չի ցանկացել հերթը խախտել:
Զրուցեցինք նաեւ այս միջադեպով ձերբակալված 35 ամյա քաղաքացու պաշտպան Լիպարիտ Սահակյանի հետ: Նա ասաց, որ իր պաշտպանյալը դեպքի մանրամասները չի հիշում: Մեր հարցին՝ ալկոհոլի ազդեցության տա՞կ է եղել իր պաշտպանյալը, փաստաբանը չհերքեց:
Նա եւս հաստատեց, որ իր պաշտպանյալը բժշկուհու հետ միջադեպ է ունեցել երեխային ուշ սպասարկելու պատճառով, իսկ թե ինչու է հարվածել բժշկուհուն, ասաց՝ առաջինը բժշկուհին է հարվածել իր պաշտպանյալին, դրանից հետո իր պաշտպանյալը՝ բժշկուհուն: Թե ինչու է բժշկուհին հարվածել քաղաքացուն՝ արդյոք թքելո՞ւ համար, փաստաբանը չպատասխանեց:
Դեպքից այլ տեղեկություններ փաստաբանը չներկայացրեց, ասաց՝ նախաքննության շահերից ելնելով չի կարող:
Կարդացեք նաև
Հիշեցնենք, որ միջադեպին միջամտել է անվտանգության աշխատակիցը՝ հեռացնելով երեխայի հորը, ինչից նա վրդովվել է ու բժշկական կենտրոնից հեռանալուց երեք ժամ անց վերադարձել՝ հաշիվ մաքրելու: Տղամարդն իր հետ բերել է իր մտերիմներին, որոնք, նախնական տվյալներով, ձեռքերով ու ապակյա շշերով հարվածել են անվտանգության աշխատակցին, որը ստացել է ճակատի, գլխի, քունքային և ծոծրակային շրջանի պատռված վերքեր։
Արփինե ՍԻՄՈՆՅԱՆ
