«Իզմիրլյան» բժշկական կենտրոնի վիրաբույժ-պրոկտոլոգ Ալեքսանդր Ղուրբանյանի հետ զրուցել ենք կոլոնոսկոպիայի՝ հաստ աղու էնդոսկոպիկ հետազոտության մասին։
Ի՞նչ է կոլոնոսկոպիան
Կոլոնոսկոպիան հատուկ գործիքի` կոլոնոսկոպի միջոցով հաստ աղիքի և ուղիղ աղիքի հետազոտման մեթոդ է:
Ո՞ր դեպքերում է անհրաժեշտ կատարել կոլոնոսկոպիա հետազոտությունը
- Կղանքի մեջ արյան, թարախի և լորձի առկայության դեպքում,
- Խրոնիկական փորլուծության և փորկապության դեպքում,
- Վքնածության, հաստ աղիքի ուղղությամբ ցավերի դեպքում,
- Անբացատրելի քաշի կորուստի դեպքում,
- Անհայտ պատճառով սակավարյունության,
- Անհայտ պատճառով մարմնի ջերմաստիճանի բարձրացման դեպքում,
- Աղիքներում օտար մարմնի առկայության զգացողության և ոչ լիարժեք կղազատման զգացողության դեպքում։
Ե՞րբ և ինչո՞ւ է անհրաժեշտ այս հետազոտությունը
Այս հետազոտությունն անհրաժեշտ է, որպեսզի ախտորոշվեն հաստ աղիքի բարորակ և չարորակ հնարավոր նորագոյացությունները, բորբոքային հիվանդությունները (կոլիտները): Կոլոնոսկոպիան վերոհիշյալ հիվանդությունների ախտորոշման ամենաինֆորմատիվ մեթոդն է:
Սակայն հարկ եմ համարում նշել, որ օրինակ՝ կղանքի մեջ արյան, թարախի և լորձի առկայություն կարող է լինել պրոկտոլոգիական այնպիսի տարածված հիվանդությունների դեպքում, ինչպիսիք են թութքը, ուղիղ աղիքի խուղակները և ուղիղ աղիքի ճաքերը:
Կարդացեք նաև
Պետք է նշեմ նաև, որ կանխարգելիչ նպատակներով 50-ն անց քաղաքացիներին անհրաժեշտ է անցնել կոլոնոսկոպիկ հետազոտություն, եթե անգամ որևէ գանգատներ չունեն: Առողջապահության համաշխարհային կազմակերպության խորհրդով առողջ մարդը 55 տարեկանից հետո պետք է 10 տարին 1 անգամ անցնի կոլոնոսկոպիկ հետազոտություն: Իսկ եթե կա գենետիկ նախատրամադրվածություն հաստ աղիքի օնկոլոգիական հիվանդությունների նկատմամբ, ապա կոլոնոսկոպիան պարտադիր է ավելի վաղ հասակում և ավելի հաճախ՝ 2-3 տարին մեկ:
Պատրաստեց՝ Մարինե ԱԼԵՔՍԱՆՅԱՆԸ
