Ադրբեջանի նախագահ Իլհամ Ալիևը հայտարարել է, որ իրենց հաջողվել է կանխել Ֆրանսկոֆոնիայի գագաթնաժողովում «Ֆրանսիայի և Հայաստանի ծրագրված սադրանքն» Ադրբեջանի դեմ:
«Վերջերս նախատեսված էր կեղտոտ սադրանք Ադրբեջանի դեմ Ֆրանկոֆոնիայի կազմակերպության շրջանակում, որի անդամ մենք չենք հանդիսանում, իսկ Հայաստանը, չգիտես ինչու, հանդիսանում է: Այդ սադրանքի հեղինակը Ֆրանսիան էր, այն Ֆրանսիան, որը հիմա հովանավորչություն է ցուցաբերում Հայաստանին… Գագաթնաժողովիում նախատեսված բանաձևի նախնական տարբերակը հիմնվում էր բացառապես հակաադրբեջանական թեզերի վրա և միանգամայն հակասում էր իրականությանը: Բայց բոլոր հակաադրբեջանական թեզերը բացառվեցին՝ շնորհիվ Ֆրանկոֆոնիայի կազմակերպությունում մեր բարեկամների ջանքերի. նրանք մեր բարեկամներն են այդ բառի ուղիղ իմաստով»,- ասել է Ալիևը «Ենի Ազերբայջան» կուսակցության 30-ամյակին նվիրված համաժողովում:
Ալիևը նշել է, որ «ֆրանկոհայկական տանդեմը չի կարողացել օգտվել այդ հնարավորությունից»: «Այսինքն, սա ցույց է տալիս, որ մեր քաղաքականությունը, որ վարում ենք միջազգային մակարդակով, և մեր հեղինակությունը միջազգային կազմակերպություններում գնահատում են: Քանի որ մենք միշտ ցանկացած աշխատանքի պատասխանատվությամբ ենք վերաբերվում»,- ասել է Ալիևը:
Պատրաստեց Վիկտորյա ԱՆԴՐԵԱՍՅԱՆԸ
Կարդացեք նաև
Հ․ Գ․ Նշենք, որ Թունիսի Ջերբա քաղաքում անցկացված Ֆրանկոֆոնիայի միջազգային կազմակերպության 18-րդ գագաթնաժողովի արդյունքում նոյեմբերի 20-ին ընդունվել են մի շարք փաստաթղթեր, այդ թվում «Ֆրանկոֆոն տիրույթում ճգնաժամային իրավիճակների, դրանց հաղթահարման և խաղաղության ամրապնդման վերաբերյալ» բանաձևը, որով անդամ-երկրներն իրենց աջակցությունն ու համերաշխությունն են հայտնում Հայաստանին։
Բանաձևը, մասնավորապես, համերաշխությունն է հայտնում Ֆրանկոֆոնիայի անդամ Հայաստանի հետ և այս համատեքստում խորին մտահոգություն հայտնում վերջերս տեղի ունեցած ռազմական էսկալացիայի (Հայաստանի տարածքային ամբողջականության և ինքնիշխանության դեմ Ադրբեջանի ագրեսիայի), հատկապես դրա հետևանքով միջազգային իրավունքի, տարածքային ամբողջականության և միջազգային մարդասիրական իրավունքի խախտումների առնչությամբ։
Կազմակերպությունը քաջալերում է կողմերին, միջազգային գործընկերների հետ համատեղ, խնդիրների բանակցված, խաղաղ և տևական կարգավորման ուղղությամբ առավելագույն ջանքերը գործադրել՝ հարգելով միջազգային իրավունքի, ներառյալ՝ տարածքային ամբողջականության և միջազգային սահմանների անձեռնմխելիության սկզբունքները՝ համաձայն ՄԱԿ-ի կանոնադրության և կոչ է անում խստորեն հարգել հրադադարը։
Բանաձևն ընդգծում է նոր էսկալացիայից խուսափելու կարևորությունը և կոչ անում լիարժեք իրականացնել 2020թ․ նոյեմբերի 9-ի եռակողմ հայտարարությունը և ողջունում գործադրվող ջանքերը՝ Լեռնային Ղարաբաղի հակամարտության խաղաղ ու արդարացի կարգավորման ուղղությամբ։
Բանաձևում անդրադարձ կա նաև մարդասիրական խնդիրներին։ Կազմակերպությունն իր մտահոգությունն է հայտնում լուծում չստացած մարդասիրական խնդիրների առնչությամբ, մասնավորապես ռազմագերիների և այլ պահվող անձանց, ինչպես նաև անհետ կորած անձանց ճակատագրի վերաբերյալ։
ՖՄԿ-ն նաև մտահոգություն է հայտնում մշակութային ժառանգության ոչնչացման առնչությամբ և իր աջակցություն ցուցաբերում Լեռնային Ղարաբաղ և հարակից տարածքներ ՅՈՒՆԵՍԿՕ-ի առաքելության իրականացմանը։
Հավելենք նաև, որ Ֆրանկոֆոնիայի Ջերբայի հռչակագրով կազմակերպության անդամ-երկրները շնորհակալություն են հայտնում Հայաստանին Ֆրանկոֆոնիայի գագաթնաժողովը վերջին չորս տարիների ընթացքում նախագահելու համար և հայտնում են իրենց համերաշխությունն Հայաստանին այն անվտանգային մարտահրավերների համատեքստում, որոնց երկիրն առերեսվում է։
