«Նման բան չկա, ընդամենը մեկ-երկու որոշում կա, դրանք փաթեթներ են, գաղտնի են»,- այսօր Արցախի խորհրդարանում կառավարության հետ հարցուպատասխանի ժամանակ այսպես արձագանքեց ԱՀ նախագահ Արայիկ Հարությունյանը՝ պատասխանելով ընդդիմադիր պատգամավոր Դավիթ Գալստյանի հարցին: Հարցը վերաբերվում էր նրան, որ 44-օրյա պատերազմից հետո շատերը 500 միլիոնի փոխհատուցում են ստացել, բայց 1-1,5 միլիոն փոխհատուցում ստացողների մեծ հերթ կա:
«Առձեռն 5 միլիոն դրամից ավել գումար ոչ ոքի չի տրամադրվել, մուրհակների տեսքով են դրանք տրամադրվել»,- ասաց Արայիկ Հարությունյանը՝ չմանրամասնելով իր արած հայտարարությունը, որ ԱՀ-ն 2023 թվական կմտնի առանց սոցիալական պարտավորությունների, նաեւ ա՞յս գումարների վճարմանն է վերաբերվում: Նա ասաց, որ հնարավորության շրջանակներում այդ գումարները ևս մինչեւ տարեվերջ կփորձեն վճարել:
Արայիկ Հարությունյանը նաեւ ահազանգեց, որ բանկերի աշխատանքի հետ կապված մեծ խնդիր կա ԱՀ-ում, բացի «Արցախբանկից», այլ բանկերի մասնաճյուղերի աշխատանքի առումով խնդիր կա, չեն աշխատում
ԱԺ փոխնախագահ Գագիկ Բաղունցն էլ հետաքրքրվեց էներգետիկ անվտանգության հարցերից: ԱՀ նախագահն ասաց, որ «Գետավան» ՀԷԿ-ի շինարարական աշխատանքներն են ակտիվ իրականացվում, 2024-ին ՀԷԿ-ը շահագործման կհանձնվի եւ Արցախն ինքնաբավ կդառնա էլեկտրաէներգիայի առումով: Նաեւ արեւային էներգիայի մարտկոցների ծրագիրն է շարունակվում:
Կարդացեք նաև
Նելլի ԳՐԻԳՈՐՅԱՆ
