«Անհրաժեշտ է ազատություն տալ տեղաշարժվող մարդկանց եւ մարդասիրական բեռներին։ Զրկանքները հասարակ մարդկանց համար անթույլատրելի են։ Մարդասիրական աղետն անթույլատրելի է»,- Sputnik Արմենիա մամուլի կենտրոնում, այսօր կայացած Մոսկվա–Աստանա–Բիշքեկ–Երեւան–Մինսկ տեսակապով տարեկան ամփոփիչ ասուլիսի ժամանակ հայտարարեց ՀԱՊԿ գլխավոր քարտուղար Ստանիսլավ Զասը՝ պատասխանելով Լաչինի միջանցքի արդեն ութ օր փակ լինելու մասին հարցին:
ՀԱՊԿ գլխավոր քարտուղարը խոսեց նաեւ ռուսական խաղաղապահ առաքելության մասին՝ ընդգծելով, որ այն առաքելությունը, որը ռուս խաղաղապահներն իրականացնում են Լեռնային Ղարաբաղում, շատ կարեւոր է կովկասյան տարածաշրջանի համար. «Մենք ռուս խաղաղապահների իրականացրած առաքելությունը համարում ենք շատ կարեւոր՝ ամբողջ տարածաշրջանի համար։ Այն դժվար է գերագնահատել»։
Ստանիսլավ Զասը հավելեց, որ իրավիճակի սրման եւ Լաչինի միջանցքի շրջափակման համատեքստում, նաեւ պետք է նշել, որ խաղաղապահների գործունեությունը հեշտ չէ: Իր կարծիքով, բոլոր կողմերը պետք է օգնեն եւ շահագրգռված լինեն խաղաղապահների գործունեությամբ։
Նելլի ԳՐԻԳՈՐՅԱՆ
