«Պարոն գնդապե՛տ, N վաշտի անձնակազմը մարտական հերթապահություն է իրականացնում N-ից N մարտական դիրքերում․ մարտավարական իրավիճակն անփոփոխ է, հակառակորդի կողմից հրադադարի խախտումներ տեղի չեն ունեցել։ N վաշտի հրամանատար, լեյտենանտ Մկրտչյան»,-զորամասի հրամանատար Վահագն Մինասյանին զեկուցում է վաշտի հրամանատար Սեւակ Մկրտչյանը։
Սյունիքում տեղակայված դիրքերից մեկում ենք։ Սյունիքի մարզպետ Ռոբերտ Ղուկասյանն է տարեմուտին այցելել առաջնագիծ։
Սեւակ Մկրտչյան
Անակնկալ էր, չէին սպասում հյուրերի։ Վաշտի հրամանատար Սեւակ Մկրտչյանը Aravot.am-ի հետ զրույցում խոստովանում է՝ տեսնելով ավտոմեքենաները՝ մի պահ որոշեց վաշտին ի զեն հրահանգը տալ, հետո նկատեց հրամանատարի ավտոմեքենան։ «Ամեն պարագայում պետք է զգոն լինենք, սթափ, հատկապես այսպիսի օրերին»,-ասում է 22-ամյա լեյտենանտ Մկրտչյանը։ Ծնունդով Գյումրիից է, ավարտել է Վազգեն Սարգսյանի անվան համալսարանը ու 20 տարի պիտի ծառայի զինված ուժերում․դեռ 16 տարի կա։
Տղաները, մարզպետի բերած նվերներն են տեղավորում՝ մարտական հեռադիտակներ, ծածկոցներ, քաղցրավենիք, ծխախոտ, հյութ, սուրճ, եւ իհարկե՝ շամպայն։ «Բայց տղերք ջան, մարտական հերթապահության իրականացնողներին խնդրում եմ չխմել, հերթապահությունից հետո կխմեք»,-ասում է Ռոբերտ Ղուկասյանը։
Կարդացեք նաև
Սահմանին կանգնած զինվորները հավաստիացնում են՝ անհոգ եղեք։ «Ուղղակի, մի 50-50 կխմենք ու մաղթենք՝ որ գալիք տարին խաղաղության տարի լինի»,-ասում են զինվորները՝ թաքուն որսալով հրամանատարի հայացքը։ Կարծես ամեն ինչ նորմալ է՝ զինվորական կարգուկանոնը չեն խախտում։
Սյունիքի մարզպետը հետաքրքրվում է զինվորների առօրյայով։ Իհարկե՝ հյուրերը չեն հրաժարվում զինվորների պատրաստած սուրճից, որն ասում են՝ աշխարհում ամենահամեղն է։
Վալտեր Խաչատրյան
Վալտեր Խաչատրյանը գեներալների՝ Էջմիածնի Արշալույս գյուղից է․ 6 ամիս է ինչ ծառայում է։ Առաջին անգամ նոր տարին դիմավորում է տնից հեռու՝ մարտական դիրքում։ «Պիտի մենք աչալուրջ լինենք, որ մեր հարազատները հանգիստ կարողանան դիմավորելու 2023 թվականը։ Գալիք տարուց միայն խաղաղություն եմ խնդրում»,-ասում է Վալտերը։
Սերգեյ Սարգսյան
5 ամսվա ծառայող Սերգեյ Սարգսյանն էլ Լոռու մարզի Հարթագյուղից է , նա էլ է առաջին անգամ Ամանորը մարտական դիրքում դիմավորելու։
Կարեն Բալյանը և Արսեն Գրիգորյանը
Սյունիքի մարզպետի խորհրդական Կարեն Բալյանն է զինվորներից մեկին է հարցուփորձ անում, հետաքրքրվում, թե որտեղի՞ց է։ «Ճամբարակից եմ, 55 օրից տուն եմ գնում»,-ասաց Արթուր Գրիգորյանը։ Պարզվեց՝ Կարեն Բալյանն էլ է Ճամբարակից ու կատակեց՝ «արյունը ձգեց» ու հայրենակիցներով միասին լուսանկարվեցին։
«Նոր եկողներին կասեմ՝ դուխով լինեն, անփորձանք ծառայեն ու երբեք չվախենան։ Հակառակորդը պիտի վախենա մեզնից»,-ավագի իրավունքով ասում է Արթուրը։
Արսեն Թուֆանյան
Վանաձորցի Արսեն Թուֆանյանը վերջին նույնպես վերջին Ամանորն է անցկացնում բանակում։ «Խաղաղություն եմ միշտ ուզել, որ ես ու ընկերներս անփորձանք ծառայենք։ Նորակոչիկներին կասեմ՝ տղերք, հետաքրքիր է բանակում, պետք չի նեղվել, չնայած ասեմ՝ նորակոչիկները ավելի դուխով են»,-ասում է Արսենը։
Ժորա Հարությունյան
Դիրքի ավագը՝ էջմիածնեցի Ժորա Հարությունյանն արդեն մեկուկես տարվա ծառայող է։ Սեպտեմբերի 13-ից 14-ը՝ Ադրբեջանի ագրեսիայի ժամանակ ընկերներ են կորցրել։ Այս նոր տարին՝ առանց զարդարանքի ու տոնածառի կդիմավորեն։ Ասում է՝ Ամանորի գիշերը կաղոթեն նահատակված բոլոր զինծառայողների համար, ու հավաստիացնում է՝ ոչ մի թիզ հող հակառակորդին։
Հրաժեշտից առաջ զորամասի հրամանատարն է մեկ անգամ եւս զգուշացնում եւ հորդորում՝աչալուրջ լինել։
«Տղե՛րք , գիտեմ հեշտ չի, բայց պիտի ուժեղ ու պինդ լինել։ Շնորհավորում եմ ձեր Ամանորը, միայն հաղթանակներ եմ մաղթում ու անփորձանք ծառայություն, անպարտելի ոգի և կորով ձեզ։ Նաեւ ձեր ծնողների, հարազատների նոր տարին եմ շնորհավորում՝ ցանկանալով անձնական հաջողություններ, բարեբեր տարի՝ բոլորիս։ Շնորհակալ եմ բոլորիդ, տղերք»,-ասում է Սյունիքի մարզպետ Ռոբերտ Ղուկասյանը։
Սահման պահողներն էլ իրենց հերթին շնորհակալ են հյուրերին՝ Ամանորին հասել են առաջնագիծ։ «Չէ՛, մենք պարտավոր ենք, բոլորս պարտական եք մեր զինվորներին, սահմանում կանգնած մեր տղերքին, մեր բանակով՝ հպարտանալ է պետք պարզապես, շնորհակալություն եւ եւս մեկ անգամ շնորհավոր 2023 թվական»,- հակադարձում է Ռոբերտ Ղուկասյանը։
Հրաժեշտից առաջ՝ խմբակային մի լուսանկար՝ Հայաստանի պետական դրոշով ու առաջնագծում կանգնած տղաների հավաստիացումը՝ մենք այստեղ եք, հանգիստ եղե՛ք․․․
Արմեն ԴԱՎԹՅԱՆ
