Ռուսաստանում բնակվող ավտոարշավորդ Արթուր Գորոյանը, որը հանդես է գալիս Հայաստանի դրոշի ներքո, օրերս Միացյալ Արաբական Էմիրություններում անցկացված 6-ժամյա ավտոարշավում հաղթելուց հետո ժամանել է պատմական հայրենիք:
Լրագրողների հետ հանդիպմանը Արթուր Գորոյանը գոհունակություն հայտնեց, որ Հայաստանում մեծ է հետաքրքրությունը սպորտի, այդ թվում՝ ավտոսպորտի նկատմամբ: Եվ քանի որ հանրության լայն շրջաններն այստեղ իրեն այնքան էլ լավ չեն ճանաչում, տեղեկացրեց, որ ծնվել է Ջավախքում, ապրում է Ռուսաստանում, բայց հանդես է գալիս Հայաստանի դրոշի ներքո: «Ես հիմնականում մասնակցում եմ Գերմանիայում կազմակերպվող դիմացկունության մրցումներին: Յուրաքանչյուր մարզիկի խնդիրը սպորտը հանրության ավելի լայն շրջաններում տարածելն է, որպեսզի երիտասարդները ոչ թե թմրանյութ, ծխախոտ կամ ալկոհոլ օգտագործեն, այլ վարեն առողջ ապրելակերպ, զբաղվեն ցանկացած տեսակի մարզաձեւով: Եվ ես որպես հայ, ձգտում եմ Հայաստան բերել այն ամեն լավը, ինչ կա սպորտում եւ ճանաչելի դարձնել Հայաստանն աշխարհին: Օրինակ, Գերմանիայում անցկացվող մրցումներում ես միակ հայ ավտոարշավորդն եմ: Եվ կուզենայի, որ այլ երկրներում՝ Ֆրանսիայում Գերմանիայում, ԱՄՆ-ում, Ռուսաստանում, Իտալիայում եւ այլուր ապրող եւ այդ երկրները ներկայացնող մյուս հայ ավտոարշավորդները հետեւեին իմ օրինակին եւ վերցնելով հայկական արտոնագիր՝ ներկայացնեն իրենց պատմական հայրենիքը, հանդես գան Հայաստանի դրոշի ներքո»,-ասաց Արթուր Գորոյանը:
Արշավորդի համոզմամբ, ժամանային առումով Հայաստանի մարզիկներին երկրի սահմաններից դուրս գալու եւ նմանատիպ մրցումների մասնակցելու համար առավելագույնը մեկ-երկու տարի է պետք լինելու: «Դա միանգամայն իրագործելի է: Դրա համար այստեղ կան եւ կարող են լինել ավելի մեծ հնարավորություններ»,-ասաց նա:
Կարդացեք նաև
Իսկ հանդիպմանը ներկա Հայաստանի ավտոմոբիլային սպորտի ֆեդերացիայի նախագահ Արսեն Մանուկյանը հավելեց, որ Հայաստանը տարածաշրջանում համեմատաբար ցածր մակարդակի վրա է: «Մենք չունենք ստանդարտներին համապատասխանող մրցուղի, սակայն ֆեդերացիան ջանքեր է գործադրում ավտոդրոմ ունենալու համար, որպեսզի մեր հանրությանը հասանելի լինի ավելի բարձր մակարդակով ավտոսպորտով զբաղվելը: Այդ նպատակով ներկայումս համապատասխան ծրագրեր ենք պատրաստում կառավարությանը ներկայացնելու համար: Դա այնքան էլ հեշտ չէ կյանքի կոչելը: Մի քանի տարի կպահանջվի: Դրա համար ստիպված մեր մարզումները կազմակերպում ենք հարեւան Վրաստանում»,-ասաց նա:
Արթուր Գորոյանը կարտտինգի զարգացման հետ կապված, որն ինչ-որ առումով ավտոսպորտի հիմքն է, տեղեկացրեց, որ ինքը սկսել է իր հետեւորդների եւ ընկերների հետ այդ ուղղությամբ կարծիքներ փոխանակել: «Պարզվեց, որ բավականին աշխատանքներ տարվում են: Կան մարդիկ, որոնք հետաքրքրված են, կան այնպիսիք, որոնք արդեն իսկ ինչ-որ բան անում են, հատկապես, Ռուսաստանից տեղափոխվածները: Դա արդեն ինչ-որ բանի սկիզբ է եւ դրական սկիզբ է»,-ասաց առաջին հայ ավտոարշավորդը:
Աշոտ ՀԱԿՈԲՅԱՆ