Առողջապահության պարտադիր ապահովագրության ապահովագրավճարներն այս պահին նախնական են, այս մասին այսօր «Հոդված 3» ակումբում հայտնեց ՀՀ ԱՆ առողջապահության ֆինանսավորման փորձագետ Սամվել Խարազյանը՝ «Առողջության պարտադիր ապահովագրություն, ինչպես է այն ներդրվելու Հայաստանում» թեմայով քննարկման ընթացքում: Նա հիշեցրեց, որ 2019թ.-ին ներկայացված հայեցակարգի նախագծով նախատեսվում էր ապահովագրավճարի տոկոսային դրույքաչափը սահմանել մոտ 6 տոկոսի չափով, ներկայումս նախատեսվում է ապահովագրավճարը տարեկան ֆիքսված թիվ սահմանել:
«Հաշվարկները պետք է իրականացվեն հայեցակարգին համապատասխան, 2023թ. պարտադիր առողջապահության ապահովագրության նախնական փուլ է հռչակված, այս տարի նաև պետք է կատարվեն ծառայությունների գների վերահաշվարկները, այդ թվում նաև ծառայությունների ընդհանուր փաթեթի վերջնական գնահատումը, որից հետո կհայտարարվի ապահովագրավճարի չափը: Շատ հաճախ տպավորություն է ստեղծվում, որ հենց 2024թ.-ից բոլորը պետք է վճարեն այդ ապահովագրավճարները, պարզաբանեմ, որ հայեցակարգով նախատեսվում է, որ համակարգը փուլային է ներդրվելու: 2024թ. փորձարկման առաջին փուլի ընթացքում նախատեսվում է, որ համակարգին կմիանան բնակչության անապահով և հատուկ խմբերը, որոնք գրեթե ամբողջությամբ կսուբսիդավորվեն պետության կողմից: Կմիանան նաև սոցիալական փաթեթի շահառուները, որոնք այսօր էլ ունեն առողջապահական բաղադրիչ եւ պետական բյուջեի հաշվին իրականացվում են նրանց առողջական ծառայությունների հատուցումները»,- նշեց Խարազյանը:
Սոցիալ-տնտեսական ուսումնասիրությունների հայկական կենտրոնի (ACSES) ղեկավար, տնտեսագետ Հայկազ Ֆանյանը ողջունելի համարեց այն հանգամանքը, որ գյուղատնտեսական տնտեսություններում աշխատող անձինք ևս կմասնակցեն իրենց ապահովագրավճարներով , իսկ նախկին տարբերակում նախատեսված չէր: «Այդուհանդերձ, հիմնական ռիսկերը ես տեսնում եմ, որ ֆինանասավորման մեխանիզմները հստակեցված չեն »,-նկատեց նա:
Հիշեցնենք, որ փետարվարի 2-ի նիստում կառավարությունը հավանության արժանացրեց Առողջության համապարփակ ապահովագրության ներդրման հայեցակարգը, որով նախատեսվում է 2027թ.-ին ամբողջությամբ ավարտել առողջության ապահովագրությունը:
Կարդացեք նաև
Լուսինե ՄԱՐԳԱՐՅԱՆ
