«Զինվորական ծառայության եւ զինծառայողի կարգավիճակի մասին» ՀՀ օրենքի 23-րդ հոդվածի համաձայն՝ «Առողջական վիճակի պատճառով բուժման կարիք ունեցող քաղաքացուն պարտադիր զինվորական ծառայության զորակոչից տարկետում տրվում է երեք անգամ` մինչեւ մեկ տարի ժամանակով: Երրորդ անգամ տրված տարկետման ժամկետը լրանալուց հետո քաղաքացին բժշկական փորձաքննության արդյունքներով կամ ճանաչվում է պիտանի զինվորական ծառայության համար, կամ սահմանափակումով պիտանի զինվորական ծառայության համար եւ զորակոչվում է պարտադիր զինվորական ծառայության, կամ ճանաչվում է զինվորական ծառայության համար ոչ պիտանի եւ ազատվում է պարտադիր զինվորական ծառայությունից»: Սակայն ՀՔԱ Վանաձորի գրասենյակ դիմած Ս.Պ.-ի պատմությունն այլ է:
2022 թ. ձմեռային զորակոչին Ս.Պ.-ն ճանաչվել է սահմանափակումով պիտանի զինվորական ծառայության համար՝ թերի բուժզննությունների արդյունքում: Վերջինիս նախկինում 3 անգամ տրամադրվել է տարկետում` առողջական խնդիրների կապակցությամբ: Սակայն ճանաչվել է պիտանի: ՀՔԱ Վանաձորի գրասենյակի տեղեկացմամբ, կազմակերպության դիմումի հիման վրա, ուղեգրվելով լրացուցիչ հետազոտությունների, զորակոչիկը ճանաչվել է ոչ պիտանի զինվորական ծառայության համար:
Իրավապաշտպան կազմակերպության դիտարկմամբ. «ինչպես նախկինում, այժմ եւս շարունակվում է զորակոչիկների թերի, ոչ համալիր զննությունների արդյունքներում վերջիններիս պիտանի ճանաչելու կենտրոնական բժշկական հանձնաժողովի պրակտիկան: Չնայած որոշ դեպքերում զորակոչային հանձնաժողովը զորակոչիկներին ուղեգրում է լրացուցիչ զննության, սակայն դրանք արդյունավետ չեն, քանի որ չեն արտացոլում զորակոչիկների իրական առողջական վիճակը, իսկ զորակոչիկների գանգատները հաճախ անտեսվում են: Ավելին, որոշ բժշկական հաստատությունների կողմից զորակոչիկների առողջական վիճակի վերաբերյալ ախտորոշումներ տրամադրվում են՝ առանց համապատասխան բուժզննություններ կատարելու»:
Զորակոչային հանձնաժողովների կողմից անտեսվում են նախկինում կատարված այն հետազոտությունները, որոնց արդյունքում զորակոչիկներին տրամադրվել է տարկետում: Պիտանիության մասին որոշումը կայացվում է՝ հիմնվելով թերի եւ իրականությանը չհամապատասխանող ախտորոշումների վրա:
Կարդացեք նաև
Սեփ. լր.
«Առավոտ» օրաթերթ
08.02.2023
