«Նախարարության խնդիրն է նման հաստատությունների համար քաղաքականություն եւ չափորոշիչներ մշակելը։ Տուն-ինտերնատներն ունեն կառավարման մարմիններ, մեր ենթակայության տակ են եւ վերահսկվում են չափորոշիչների սահմաններում։ Իսկ ընթացիկ ստուգումներ եղել են, եւ վերջին ստուգման ժամանակ իրավապահները դա հայտնաբերել են»,-խորհրդարանում լրագրողների հետ զրույցում այսօր ասաց ՀՀ աշխատանքի եւ սոցիալական հարցերի նախարարի տեղակալ Դավիթ Խաչատրյանը՝ անդրադառնալով հարցին, թե նախարարությունը տեղյակ չի եղե՞լ Վարդենիսի նյարդահոգբանական տուն-ինտերնատում իրավապահների բացահայտած խոշտանգումների դեպքերից։
Հարցին՝ որեւէ ահազանգ չեք ստացե՞լ, փոխնախարարը պատասխանեց․ «Չունեմ նման տեղեկություն։ Բայց նախարարությունն ամեն ահազանգի դեպքում հետեւողական է լինում։ Ես չգիտեմ՝ իրավապահները պլանավորվա՞ծ ստուգում են արել, թե ոչ, բայց խախտումները հայտնաբերվել են։ Նախարարությունից այցերի պարբերաբար գնում են։ Ե՛վ մանկատներ, ե՛ւ տուն-ինտերնատներ։ Կապը կա։ Չի եղել նման խնդիր, ականատես չենք եղել այնպիսի խնդիրների, որ քննարկման առարկա կդառնային։ Քննությունը ցույց կտա, թե ով է մեղավոր»։
Լուիզա ՍՈՒՔԻԱՍՅԱՆ
