Ագարակի պղնձամոլիբդենային կոմբինատի աշխատակիցները, մասնավորապես «Բելազ» մակնիշի ավտոմեքենաների վարորդները մարտի 3-ին, կեսօրից հետո բողոքի ցույց են անում։ Aravot.am-ի տեղեկություններով, կոմբինատի տնօրինությունը աշխատանքից ազատել է վարորդ Կարեն Ղուկասյանին։ Վերջինիս գործընկերներն էլ ի պաշտպանություն՝ նրա, կանգնեցրել են բեռնատարները ու չեն աշխատում։ Արդյունքում՝ խաթարվել է ՝ Ագարակի պղնձամոլիբդենային կոմբինատի գործունեությունը։ Aravot.am-ի տեղեկություններով, Կարենը Ղուկասյանը մինչեւ աշխատանքից ազատվելը մի քանի անգամ նկատողություն էր ստացել։
Վերջին նկատողությունը, որը աշխատանքից ազատելու հիմք դարձավ, այն էր, թե իբր Կարեն Ղուկասյանն ավտոմեքենայի բաքը բացել է առանց ձեռնոց հագնելու, այսինքն խախտել է աշխատանքային անվտանգության կանոնները։ «Թող ձեռնոց տան ու նոր պահանջեն ոնց աշխատենք»,-մեզ հետ ունեցած հեռախոսազրույցում նշեցին Ագարակի պնձնամոլիբդենային կոմբինատի վարորդները։
Պարզաբանումներ ստանալու համար դիմեցինք «ԳեոՊրոՄայնինգ Գոլդ»-ի մամուլի պատասխանատու Ռուզաննա Գրիգորյանին, որը խոստացավ ամբողջական ու մանրամասն տեղեկատվություն տրամադրել վաղը։
Արմեն ԴԱՎԹՅԱՆ
