ՀՀԿ ԳՄ անդամ Գագիկ Մինասյանը Արցախի հիմնախնդրի լուծման եւ Մադրիդյան սկզբունքի շուրջ Նիկոլ Փաշինյանի արած հայտարարությունները միմյանց հակասող եւ խիստ վտանգավոր գնահատելով՝ ասաց. «Վարչապետի աթոռը զբաղեցնող անձը ինչո՞ւ է հիմա կեղծ օրակարգ մտցնում շրջանառության մեջ: Ինչ է, ինքը գժի տե՞ղ է դնում բոլոր պետությունների ղեկավարներին, թե՞ ինքն իրեն է գժի տեղ դնում, ինչպես մի անգամ արդեն արել է՝ իր իսկ խոստովանության համաձայն: Թե՞ հասարակությանն է փորձում գժի տեղ դնել: Ես կարծում եմ՝ ինքը հասարակությանն է մանիպուլացնում, ինչը նշանակում է՝ հասարակությանը գժի տեղ է դնում: Եվ որպեսզի հասկանանք, թե ինչ նպատակ է հետապնդում այդ կեղծ օրակարգը շրջանառության մեջ դնելով, պետք է մի քանի դրվագի անդրադառնանք:
Ասում է՝ ակնհայտ չի՞ արդյոք, որ Ադրբեջանը երբեք չէր համաձայնի Արցախի անկախացմանը: Ինքը չգիտի՞ արդյոք, որ որեւէ ինքնորոշվող երկիր չի անկախացել մետրոպոլիայի համաձայնությամբ: Իհարկե, գիտի: Եթե ինքը գիտի, որ Արեւելյան Թիմորը, Կոսովոն անկախացել են մետրոպոլիաների կամքին հակառակ, հարց է առաջանում, թե ինչո՞ւ է այսօր այդ հարցը բարձրացնում, սրում:
Ինքը չգիտի՞, որ երբ մետրոպոլիան փորձում է անկախացման գործընթացը ընդհատել բիրտ ուժի կիրառմամբ, վրա է հասնում գործընթացի ավարտը, եւ միջազգային հանրությունը ճանաչում է անկախացող երկրին ու դրանով պրոցեսն ավարտվում է: Այդպես եղել է Արեւելյան Թիմորում եւ Կոսովոյում: Եվ այդպես լինում էր նաեւ Հայաստանում: Բոլորդ պետք է հիշեք, որ քառօրյա պատերազմի ժամանակ հանրապետության երրորդ նախագահը հրավիրեց օտարերկրյա դեսպաններին ու հայտարարեց, որ եթե այսպես շարունակվի, ապա Հայաստանը կճանաչի Արցախի անկախությունը՝ տրամաբանորեն հետեւելով նախորդ դեպքերին: Եվ միջազգային հանրությունը, առնվազն անվտանգության խորհրդի երեք մշտական անդամները եւս կճանաչեն, որովհետեւ Ադրբեջանը խախտում է երեք հիմնական սկզբունքներից մեկը՝ ուժի եւ ուժի սպառնալիքի չկիրառումը: Եվ դա էր նաեւ պատճառը, որ Ադրբեջանն իսկույն վազեց Մոսկվա եւ խնդրեց, որպեսզի հրադադար կնքվի:
Այստեղ երկրորդ հարցն է առաջանում: Երբ 44-օրյա պատերազմի ժամանակ այդ հնարավորությունը կար՝ միանգամից ճանաչել Արցախի անկախությունը եւ օդում կախված խիստ հավաստի տեղեկությունների համաձայն՝ Մոսկվայում այդ ժամանակվա մեր ԱԳ նախարարին հորդորում էին ճանաչել, Հայաստանը դա ինչո՞ւ չարեց: Ավելին, պատերազմից հետո Պուտինը հրապարակավ նախատեց Հայաստանի իշխանություններին, որ իրենք կորցրել են Արցախը ճանաչելու պատեհ առիթը, որը, կրկնում եմ, չափազանց պատեհ առիթ է, երբ մետրոպոլիան անցնում է ագրեսիայի»:
Կարդացեք նաև
Աշոտ ՀԱԿՈԲՅԱՆ
