Ինչպես կասեցնել Արցախն Ադրբեջանին բռնակցելու, թշնամուն հանձնելու ծրագրերը։ Ինչ քայլեր կարելի է առաջարկել հասարակությանը։ «Համախմբում» շարժման անդամների երկարատև քննարկումներն այս հարցի շուրջ հանգեցրել են «Ազատ Արցախ- Հայաքվե» քաղաքացիական օրենսդրական նախաձեռնության մտահղացմանը, որի շուրջ երեկ լայնածավալ քննարկումներ իրականացվեցին շարժման անդամների, ինչպես նաև գործընկեր անհատների և կազմակերպությունների հետ։
Հանդիպման 100-ից ավելի մասնակիցներին ներկայացվեց նախաձեռնության էությունը․ այն փաստացի Արցախի ինքնորոշման մերժումը քրեականացնող օրենքի նախագիծ է, որը կյանքի է կոչվելու Հայաստանի քաղաքացիների կամարտահայտության միջոցով։ Հանրաքվեն ու դրան նախորդող օրենսդրական նախաձեռնությունը սահմանադրական դաշտում այսօր առավել ազդեցիկ իրավական-քաղաքական գործողություններից մեկը կարող է դառնալ։ Նախաձեռնող խումբն առաջարկում է օրենսդրական փոփոխության ստորագրահավաք-քվեարկություն սկսել, որով ծանր պատիժ է նախատեսվում Հայաստանի Հանրապետության անունից Արցախն Ադրբեջանի մաս ճանաչող և Հայոց ցեղասպանության նշանակությունը նսեմացնող գործողությունների համար։ Նախաձեռնողները հիմք են ընդունում ՀՀ Անկախության հռչակագիրը, ՀՀ Սահմանադրությունը և ՀՀ Գերագույն Խորհրդի՝ 1992թ․ հուլիսի 8-ի որոշումը։ Մասնավորապես, Անկախության Հռչակագրում ամրագրված է երկու համազգային նպատակ․ Արցախի ու Հայաստանի հանրապետությունների միավորում, ու Հայոց ցեղասպանության ճանաչում։ Սրանք մեր պետության կողմից սահմանված անժամկետ համազգային նպատակներն են։
Կարդացեք նաև
Նախաձեռնության նախապատրաստական լայնածավալ փուլից հետո նախաձեռնող խումբը դիմելու է ԿԸՀ, որից հետո էլ սահմանվելու է 60-օրյա ժամկետ քվեարկություն-ստորագրահավաքը կազմակերպելու համար։ 50 հազար ստորագրությունը թույլ կտա ներկայացնել օրենսդրական նախաձեռնությունը ՀՀ ԱԺ։ Այժմ մեկնարկում են նախապատրաստական աշխատանքները, նախաձեռնությանը միանում են նոր անհատներ և կազմակերպություններ։ Նախաձեռնության ծավալմանը զուգընթաց, կտրամադրվի նոր տեղեկատվություն։
«Համախմբում» շարժում
