Այս տարվա հունվարի 25-ին Ռուս-հայկական (Սլավոնական) համալսարանը (ներկայացուցիչ՝ Կարեն Սիմոնյան) հայցով դիմեց դատարան՝ ընդդեմ ԱԺ ՔՊ-ական պատգամավոր Վահագն Ալեքսանյանի՝ գումարի բռնագանձման մասին պահանջով:
Փետրվարի 10-ին դատավոր Ժաննա Ասատրյանը գործն իր վարույթ վերցնելու որոշում կայացրեց, չնայած ՀՀ Երեւան քաղաքի առաջին ատյանի ընդհանուր իրավասության դատարան հայցադիմումն ստացվել եւ դատավոր Ժ. Ասատրյանին էր մակագրվել հունվարի 25-ին:
Այդ նույն օրվա որոշմամբ, դատարանը որոշեց՝ գործը քննել պարզեցված վարույթի կարգով: Դատարանը որոշում է նաեւ վճռի եզրափակիչ դատական ակտը հրապարակել դատական իշխանության պաշտոնական կայքի միջոցով մայիսի 26-ին:
Նկատենք, որ «ԴատաԼեքս» տեղեկատվական համակարգում նշված է 2022 թվական:
Կարդացեք նաև
Դատարանը մերժում է հայցվորի միջնորդությունը` հայցի ապահովման միջոց կիրառելու մասին, իսկ պատգամավոր պատասխանողն առարկություն կամ պատասխան դատարան չի ներկայացնում:
Համալսարանի ներկայացուցիչը հայտնել էր, որ Վահագն Ալեքսանյանի եւ Ռուս-հայկական (Սլավոնական) համալսարանի միջեւ 2019 թվականի սեպտեմբերի 5-ին կնքվել է թիվ 12 վճարովի կրթական ծառայություններ մատուցելու մասին պայմանագիրը: Համալսարանի ռեկտոր Ա. Դարբինյանի 12.02.2021 թվականի թիվ 02/159 հրամանի համաձայն՝ պատասխանողը հեռացվել է համալսարանից։
Պատասխանողը պարտավոր էր կատարել պայմանագրով սահմանված պարտավորությունը, այն է՝ վճարել 655.500 ՀՀ դրամ, որպես ուսման վարձավճար, սակայն չէր կատարել վճարումը, ուստի բուհի համբերության բաժակը «լցվել» էր:
Վահագն Ալեքսանյանը համարվել է դատարանի կողմից ծանուցված: Սակայն այդպես էլ դատարան չներկայացավ, անգամ ներկայացուցիչ չուղարկեց դատարան:
«ԴատաԼեքս» տեղեկատվական համակարգում երեկվանից տեղադրվեց վճիռը, համաձայն որի՝ դատարանը բավարարել է համալսարանի պահանջը:
Ըստ դատարանի պատճառաբանությունների, հայցը հիմնավոր էր, ենթակա բավարարման:
Պատգամավորը տասնհինգօրյա ժամկետ ուներ՝ բողոք բերելու համար…
Ռուզան ՄԻՆԱՍՅԱՆ
«Առավոտ» օրաթերթ
29.06.2023
