ԱԺ աշխատանքի եւ սոցիալական հարցերի մշտական հանձնաժողովը Հերիքնազ Տիգրանյանի նախագահությամբ կայացած արտահերթ նիստում երկրորդ ընթերցմամբ քննարկել է ««Հաշմանդամություն ունեցող անձանց իրավունքների մասին» օրենքում փոփոխություններ եւ լրացումներ կատարելու մասին» եւ ««Անձի ֆունկցիոնալության գնահատման մասին» օրենքում փոփոխություններ եւ լրացումներ կատարելու մասին» օրենսդրական փաթեթը:
ՀՀ աշխատանքի եւ սոցիալական հարցերի նախարարի տեղակալ Տաթևիկ Ստեփանյանի տեղեկացմամբ առաջին ընթերցմամբ ընդունվելուց հետո փաթեթը լրամշակվել է, տեխնիկական բնույթի փոփոխություններից բացի կատարվել է մեկ բովանդակային փոփոխություն, որը վերաբերում է հաշմանդամություն ունեցող անձանց դեղապահովման հարցին: Փոփոխության արդյունքում 100 տոկոսով անվճար դեղեր կստանան նաեւ երրորդ խմբի հաշմանդամություն ունեցող անձինք:
Առաջարկներ էր ներկայացրել ԱԺ «Քաղաքացիական պայմանագիր» խմբակցության պատգամավոր Զարուհի Բաթոյանը, որոնք հեղինակը չի ընդունել: Պատգամավորի առաջարկները չի ընդունել նաեւ հանձնաժողովը: Զարուհի Բաթոյանն առաջարկում էր օրենքից չհանել տարեկան ծրագրի վերաբերյալ նորմը, ինչպես նաեւ չհրաժարվել մեկ այլ՝ «հաշմանդամություն ունեցող անձանց խնամքի ծառայությունների փոխակերպման միջոցառումների ծրագրի» լիազորող նորմից:
Նախագծին հանձնաժողովը դրական եզրակացություն է տվել:
Կարդացեք նաև
Նիստը կայացել է սեպտեմբերի 12-ին:
ՀՀ ԱԺ
