«Մեր տրանսպորտայի ռեֆորմը դեռ ավարտված չէ, բայց իրականացման լավ մասում ենք գտնվում»,- այս մասին այսօր լրագրողների հետ ճեպազրույցում ասաց «Քաղաքացիական պայմանագիր» կուսակցության Երեւանի քաղաքապետի թեկնածու Տիգրան Ավինյանը։ «Երբ որ մենք նախկինում ունեցել ենք շատ «Գազել»-ներ եւ շատ գծեր, եղել է անորակ։ Հիմա մենք ունենք շատ ավելի քիչ գծեր, ավելի մեծ տարողունակությամբ ավտոբուսներ, բայց իրենց քանակը նույնպես ավելի քիչ է։
Եվ, այո, անհարմարություններ կարող են ստեղծվել մարդկանց մոտ՝ մի փոքր ավել պետք է քայլեն։ Բայց կերթեւեկեն շատ հարմար տրանսպորտով, տրանսպորտը երբեք չի ուշանա հաջորդ տարվա վերջին, հաստատակամ կարող եմ դա պնդել։ Մենք կգործարկենք միասնական տոմսային համակարգ, որը մեզ թույլ կտա տրանսպորտային քարտերով օգտվել եւ մետրոյից, եւ մյուս տրանսպորտից։ Եվ տրանսպորտային ռեֆորմը ներառում է եւս մեկ կոմպոնենտ՝ առանձնացված ավտոբուսային գծեր, որոնցով երթեւեկում են միայն ավտոբուսները»,- ասաց Ավինյանը։
Հարցին, թե որքանո՞վ է իրատեսական համարում ճոպանուղու եւ մետրոյի նոր կայարանի կառուցումը, Տիգրան Ավինյանը պատասխանեց․ «Մինչեւ 2028 թվականը շատ իրատեսական եմ համարում Աջափնյակ մետրոյի կառուցումը։ Մինչեւ 2026-2027 թվականը շատ իրատեսական եմ համարում Նոր Նորքի 6-րդ զանգվածից մինչեւ Նոր Մարաշ եւ Կենտրոն ուղու գործարկումը։ Եվ նաեւ շատ իրատեսական եմ համարում մինչեւ 2026 թվականը մետրոյի նոր կայարանի կառուցումը Սուրմալու առեւտրի կենտրոնի մոտ։ Եվ ես կարծում եմ՝ սրանք մեր հանրային տրանսպորտի կարեւորագույն նոր հանգույցներն են, որոնք էականորեն բեռնաթափելու են մեր քաղաքը»։
Կարդացեք նաև
Ռոզա ՀՈՎՀԱՆՆԻՍՅԱՆ
