Հասարակական ակտիվ գործունեությամբ զբաղվող Արթուր Չախոյանը օրեր առաջ «Հետքի» հետ զրույցում հայտարարեց` պարզել է, որ իր վրա մահափորձ կատարած անձը՝ Էդգար Կուչուկյանը, facebook-ում նկարներ ունի, որոնք համակապակցված են Քաղաքապետարանի տրանսպորտի վարչության նախկին պետ Հենրիկ Նավասարդյանի հետ:
«Էդգար Կուչուկյանն ո՞վ է»,- Aravot.am-ի հետ զրույցում զարմացավ Հենրիկ Նավասարդյանը, հետո հարցրեց Կուչուկյանի տարիքն ու շարունակեց. «Ես 70 անց մարդ եմ, թոշակառու, ի՞նչ գործ ունեմ Էդգար Կուչուկյանի հետ, ո՞վ է դա: Ես չեմ կարծում, որ միտումնավոր է անունս կապվում մահափորձ իրականացնողի հետ, որովհետեւ նման բաներից շատ հեռու մարդ եմ: Չեմ բացառում, որ քաղաքապետարանում կամ տարբեր տեղերում աշխատած տարիներիս ինչ-որ մեկը հետս նկարված լինի, ես ինչ իմանամ՝ ում մասին է խոսքը»:
Սոս Քարամյանի լուսանկարը՝ ֆեյսբուքյան էջից
Կուչուկյանի ներկայացուցիչ, փաստաբան Սոս Քարամյանն էլ ասաց՝ տեղեկություն չունի՝ ինչ նկարների մասին է խոսքը ու արդյոք Կուչուկյանը որեւէ կապ ունի Հենրիկ Նավասարդյանի հետ. «Բայց ինչպես միշտ՝ Արթուր Չախոյանը փորձում է ինչ-որ չնչին համակցություն օգտագործել իրական նպատակները շեղելու համար: Այսինքն՝ այս երկրում անհնար է ինչ-որ մեկը ցանկացած պետական համակարգում ծանոթ չունենա կամ ինչ-որ կյանքի բերումով առնչված չլինի: Իսկ տնտղել, գտնել, որ ինչ-որ քաղաքապետարանի, ինչ-որ տրանսպորտի վարչության աշխատողի հետ ինչ-որ մի պահ հանդիպել է, դա որեւէ կերպ պատճառ չէր էլի Արթուր Չախոյանի նկատմամբ մահափորձ իրականացնելու համար: Ի վերջո, Արթուր Չախոյանն իր գործունեության ընթացքում էնպիսի արարքներ կամ բացահայտումներ չի արել, որի համար անձին կարելի էր սպանել, թող վերջացնի էս խոսակցությունները»:
Արփինե ՍԻՄՈՆՅԱՆ
