Ազգային ժողովի «Հայաստան» խմբակցության պատգամավոր Արթուր Խաչատրյանը խորհրդարանում լրագրողների հետ ճեպազրույցում անդրադարձավ Իրանում կայացած «3+3» ձեւաչափով հանդիպմանը։
«Դա «3+3» չէր, «3+2» էր, կապրենք՝ կտեսնենք։ Տարածքային ամբողջականության սահմանումը, եթե հղում կատարենք Հելսինկիի եզրափակիչ ակտին, նշանակում է տարածքային վեճերը խաղաղությամբ լուծել։ Հետեւաբար, Ադրբեջանը, որը երեկվա հայտարարությունում ընդունում է, երեկ արդեն ընդունել է, այսօր պետք է իր օկուպացիոն զորքերը հաներ Գեղարքունիքի, Սյունիքի եւ Վայոց ձորի մարզերից։ Բայց Ադրբեջանը, մի կողմից ընդունելով նման հայտարարություն, մյուս կողմից Հայաստանում պահելով իր օկուպացիոն զորքերը, հստակ ուղերձ է հղում, որ ինքը որեւէ դեպքում խաղաղության գնալու ցանկություն չունի, եթե այդ «խաղաղության պայմանագիրը» չլինի Հայաստանի կապիտուլյացիայի փաստաթուղթ»,- ասաց Արթուր Խաչատրյանը։
Հարցին, թե կարո՞ղ ենք ասել, որ այսպիսով Արեւմուտքը գործընթացներից դուրս է մնում, Արթուր Խաչատրյանը պատասխանեց. «Ամենալուրջ խնդիրն այն է, որ Հայաստանը չդառնա Արեւմուտքի, Հյուսիսի եւ Հարավի բախման թատերաբեմ։ Ցավոք սրտի, այս իշխանությունների ձախողված արտաքին քաղաքականությունը հենց բերել է նրան, որ Հայաստանը վերածվել է բախումների թատերաբեմի։ Որտեղ են ընթանում բանակցությունները երկրորդական հարց է, առաջին հարցն այն է, թե բանակցությունների սեղանին ի՞նչ է դրված, եւ այն մարդը, ով Հայաստանն է ներկայացնում, արդյոք պաշտպանո՞ւմ է հայկական շահերը։ Ցայժմ մենք որեւէ հիմք չունենք պնդելու, որ Հայաստանի բանակցողները Հայաստանի շահն են պաշտպանում, որովհետեւ անկախ նրանից, թե բանակցային սեղանը որտեղ է եղել, այդ սեղանին դրվել են փաստաթղթեր, որոնք հայկական շահերին չեն համապատասխանում»։
Հարցին, թե ի՞նչ է անում ընդդիմությունը՝ իրավիճակը փոխելու համար, Խաչատրյանը պատասխանեց. «Վերջը պետք է փոխել իշխանությունը։ Հասարակության մեջ, քաղաքական ներկապնակի վրա միակ լուրջ կազմակերպված ինստիտուցիոնալ ընդդիմությունը մենք ենք, այսինքն՝ այստեղ հավաքված ընդդիմությունն է։ Մենք անում ենք այն, ինչ ընդդիմությունը պետք է անի։ Նաեւ փորձում ենք ինչ-որ ձեւով մարդ մոբիլիզացնել փողոցում։ Բայց նայենք այլընտրանքային ընդդիմությունը քանի՞ մարդ է կարողանում մոբիլիզացնել։ Ինչքան ակտիվ միջամտության համար դժգոհ մարդ մոբիլիզացվի, այնքան շուտ մենք կկարողանանք այս իշխանություններից ազատվել, փոխել պետության քաղաքական կուրսը եւ շրջելի դարձնել գործընթացները»։
Կարդացեք նաև
Ռոզա ՀՈՎՀԱՆՆԻՍՅԱՆ
